Kólik qoljetimdiligin jaqsartý jáne qala mańyndaǵy aımaqtyń turǵyndaryn qoǵamdyq kólikpen qamtamasyz etý úshin Almaty qalasynyń ákimdigi bıyl qala mańyndaǵy 10 jańa marshrýtty iske qosýdy josparlap otyr.
Olar qala sheginen 50 km radıýsta ornalasqan Almaty oblysynyń Talǵar, İle, Qarasaı jáne Jambyl aýdandaryndaǵy birqatar eldi mekendi qamtıdy, dep habarlaıdy Almaty-akshamy.kz.
Marshrýttar Jetisý bazary – Dáýlet kenti, «Almaty 1» temirjol vokzaly - Týǵanbaı kenti, Nura, «Almaty 2» temirjol vokzaly – Tuzdybastaý kentindegi «Sultan» kesheni, «Raıymbek batyr» metro beketi – Elaman kenti, «Saıahat» avtovokzaly – Qaroı kenti, «Sálem» bazary soltústik aınalma – Isaev kenti, «Adem» saýda úıi – Batyr kenti baǵyttary boıynsha júredi. Sonymen birge, Tóle bı-Ássaýı kósheleriniń qıylysyndaǵy burylystan Qarǵaly, Shamalǵan jáne Myńbaev eldi mekenderi baǵytynda birneshe marshrýt uıymdastyrylady.
Sonymen qatar, bıyl №9 jańa qalalyq marshrýt ashylyp, №97 jáne №89 eki jańa marshrýttyń ashylýy josparlanǵan.
Jańa marshrýttar áleýmettik mańyzy bar qatynastarǵa jáne halyq úshin qoǵamdyq kólikte jol júrýdiń qoljetimdiligin qamtamasyz etý maqsatynda sýbsıdıalaýǵa jatady.
Aıta keteıik, «Almaty qalasyn damytýdyń 2025 jylǵa deıingi baǵdarlamasyna jáne 2030 jylǵa deıingi orta merzimdi perspektıvaǵa» sáıkes, 2024 jyldyń sońyna deıin Almaty qalasynyń ákimdigi qala mańyndaǵy 30 jańa marshrýtty uıymdastyrýdy josparlap otyr.
Qazirgi tańda qalalyq mobıldilik basqarmasy marshrýttardy bekitý jáne olardy áleýmettik mańyzy bar marshrýttar tizilimine engizý týraly qaýly jobasyn ázirledi. Qujatpen www.legalacts.kz ashyq normatıvtik-quqyqtyq aktiler portalynda tanysýǵa bolady. Tasymaldaýshyny jáne osy baǵyttardy iske qosý merzimin aıqyndaýǵa arnalǵan baıqaý qala máslıhaty qujatty bekitkennen keıin ótkiziledi.