Memleket basshysynyń tapsyrmasyna sáıkes, Almaty qalasynyń joǵarǵy bóliginde kópqabatty turǵyn úıler men núkteli qurylys salýǵa moratorıı engiziledi. Bul jóninde qalalyq Josparlaý jáne ýrbanıstıka basqarmasy habarlady.
Jańa shekteýler Talǵar tas jolynyń, Úlken Almaty aınalma jolynyń (ÚAAJ), ál-Farabı dańǵylynyń, Saın jáne Jandosov kósheleriniń ońtústiginde ornalasqan aýmaqtarǵa qatysty.
Basqarma málimetinshe, bul aımaqtardaǵy tyǵyz ári josparsyz qurylys áleýmettik ınfraqurylymnyń jetispeýshigi sıaqty birqatar júıeli máselege ákelip soǵyp otyr. Atap aıtqanda, mektepter men medısınalyq mekemelerdiń tapshylyǵy seziledi.
Sondaı-aq, qalanyń joǵary bólikterinde ortalyqtandyrylǵan sý jáne káriz júıesi joq. Bar jeliler birqatar monopolısiń qaramaǵynda, olardyń qýaty jetkiliksiz ári shamadan tys júktelgen. Kóshe-jol jelisi kólik legine eseptelmegen, al aryq júıesiniń bolmaýy jaýyn-shashyn kezinde sý tasqynyna sebep bolady.
Taýly aýmaqtardyń bir bóligi ylǵaldanǵan kezde jyljyp ketetin turaqsyz sazdy topyraqta ornalasqan. Zańsyz qurylys, jasyl jelekt otaý, ruqsatsyz septıkterdi qoldaný topyraqtyń jyljyp, qurylystyń qıraýyna sebep bolýy múmkin.
Buǵan qosa, qalaǵa oblystan qosylǵan 1,5 myń aýyl sharýashylyǵy maqsatyndaǵy jer telimderi (2 000 gektardan astam) ornalasqan. Jer kodeksine sáıkes, mundaı jerdi paıdalanýǵa tyıym salynady. Bul aımaqtardy turǵyn úıge aınaldyrý qalanyń ınjenerlik jelilerine, áleýmettik nysandarǵa jáne kólik ınfraqurylymyna qosymsha júk túsiredi.
«Qazirgi tańda qalada eńisi 15 gradýstan asatyn betkeılerge qurylys salýǵa tyıym salynǵan, joǵarǵy bólikte ǵımarat bıiktigi 3 qabattan aspaýǵa tıis jáne eńisti kesýge bolmaıdy. Soǵan qaramastan, keıbir qurylysshylar zańmen naqty rettelmegen taýnhaýstar sekildi kópqabatty nysandar salýdy jalǵastyryp keledi. Endi engizilgen moratorıı aıasynda mundaı turǵyn úılerge joba aldyndaǵy qujattar berilmeıdi. Bul shekteý qurylys jumystary bastalyp ketken nysandarǵa qatysty emes. Sonymen qatar, basqarma 2040 jylǵa deıingi Bas josparǵa túzetýler engizýdi josparlap otyr. Bul túzetýler jasyl aımaqty keńeıtýge jáne taý bókteri aýmaqtardyń teńgerimdi damytýǵa baǵyttalady. Naqty nátıjeler týraly qosymsha habarlanady», – dedi qalalyq Josparlaý jáne ýrbanıstıka basqarmasynyń basshysy Almas Jańbyrshy.