Búgin Bilim basqarmasy men Memlekettik aktıvter basqarmasynyń ókilderi jáne Qoǵamdyq keńes músheleri «Araı» jekemenshik mektebiniń oqytýshylary jáne oqýshylardyń ata-analarymen kezdesti. Bul mektep Aqsaı-2 shaǵynaýdanyndaǵy 51-úıde ornalasqan.
Kezdesý barysynda qatysýshylarǵa «Araı» jáne «Senim» uıymdarymen jasalǵan jaldaý sharttarynyń buzylǵany, al 2023 jyly atalǵan mekemelerge ǵımarattardy qaıtarý týraly resmı eskertýler jiberilgeni túsindirildi.
Alaıda mekeme óz erkimen nysandy bosatýdan bas tartqan soń sotqa júginýge týra keldi. Ǵımaratty komýnaldyq menshikke qaıtarý týraly sheshim Memlekettik aktıvter basqarmasynyń paıdasyna shyǵaryldy. 2025 jyly 3 shildede Almaty qalasynyń mamandandyrylǵan aýdanaralyq ekonomıkalyq soty «Araı» mekemesine ǵımarattan shyǵarýdy keıinge qaldyrý týraly ótinishin qanaǵattandyrmady.
«Sot ǵımaratty komýnaldyq menshik ıesine – Memlekettik aktıvter basqarmasyna májbúrli túrde qaıtarý týraly sheshim shyǵardy. 2003 jyly 1 shildeden bastap «Araı» mekemesimen jasalǵan jaldaý sharty kúshin joıǵan. Sodan beri birneshe ret sot sheshimi bizdiń paıdamyzǵa shyqty. Qazirgi ýaqytta mektep ǵımaratty zańsyz ıelenip otyr. Máseleni yń-shyńsyz sheshýge jasalǵan barlyq áreket eleýsiz qaldy. Osyǵan baılanysty sot sheshimin májbúrli túrde oryndaý týraly sheshim qabyldandy», – dedi Memlekettik aktıvter basqarmasynyń basshysy Erkinbek Ámirǵalı.
Bosaǵan ǵımarat qala muqtajy úshin qaıta paıdalanylady. Bul shara mektepke deıingi bilim berý mekemeleriniń jelisin keńeıtip, búldirshinderdi balabaqshamen qamtýdy arttyrýǵa baǵyttalǵan. Barlyq is-shara zań aıasynda júzege asyrylyp jatyr.
«Bul ǵımaratta buryn №52 balabaqsha ornalasqan edi. Qazir onda 200-ge jýyq oqýshy bilim alyp jatyr. Ǵımarat bosatylyp, jóndeý jumystary aıaqtalǵan soń qaıtadan balabaqsha retinde ashylady. Onyń syıymdylyǵy 320 orynǵa deıin artady. Ásirese, bul 5 myńnan astam bala kezekte turǵan Áýezov aýdany úshin óte mańyzdy. Árbir oqýshynyń oqýyn jalǵastyrý máselesi turǵylyqty mekenjaıyna sáıkes jeke qaralady», – dedi Bilim basqarmasynyń basshysy Saıran Saıfedenov.
Sonymen qatar Bilim basqarmasy ata-analarmen kezdesip, oqýshylardy qaladaǵy ózge mektepterge, shaǵynaýdandarǵa ornalastyrý boıynsha jumys júrgizýge daıyn.
Jalpy, 2002 jyldan beri qalada 11 jekemenshik oqý ornyna, sonyń ishinde «Araı» mekemesine, 10 balabaqsha ǵımaraty men bir kombınat ǵımaraty jalǵa berilgen bolatyn. 2020 jyly mamyrda qala ákimdiginiń sheshimimen bul nysandardy kezeń-kezeńmen komýnaldyq menshikke qaıtarý jáne olardy memlekettik balabaqsha retinde qaıta paıdalaný maqsatynda jaldaý sharttaryn buzý jumystary bastalǵan bolatyn.