Taraptar Almatynyń damý ortalyǵymen birlesip tıisti memorandýmǵa qol qoıdy.
Almaty qalasynyń Seısmıkalyq qaýipsizdik jáne jumyldyrý daıyndyǵy basqarmasy men Tótenshe jaǵdaılar jáne tabıǵı apattar qaýpin azaıtý ortalyǵy birqatar baǵyt boıynsha yntymaqtastyqty kúsheıtedi, dep habarlaıdy Almaty-akshamy.kz
Basqarma basshysy Batyrhan Súleımenov qalada ǵımarattarǵa seısmıkalyq aýdıt júrgizý men TJ kezinde halyqtyń qaýipsiz minez-qulyq mádenıetin arttyrý boıynsha jumystyń belsendi júrgizilip jatqanyn atady. Onyń aıtýynsha, seısmoaýdıt aıaqtalǵannan keıin 6 baldan jáne odan joǵary jer silkinisteriniń yqtımal nátıjesin modeldeýdiń arnaıy aqparattyq júıesi ázirlenedi.
«Memorandým Ortalyq Azıa elderiniń qoldanystaǵy ulttyq júıesin biriktirý jolymen jer silkinisiniń týyndaý qaýpi týraly erte habarlaýdyń jáne ózara habarlaýdyń óńirlik júıesin kúsheıtý jónindegi qyzmetti shoǵyrlandyrýǵa baǵyttalǵan. Sondaı-aq, biz túrli apattyń qaýip faktoryn baǵalaý boıynsha halyqaralyq ádistemelerdi birlesip engizemiz», - dedi Batyrhan Súleımenov.
Óz kezeginde tótenshe jaǵdaılar jáne tabıǵı apattar qaýpin azaıtý ortalyǵynyń dırektory Serik Áýbákirov bul kelisim barlyq múddeli taraptyń kúsh-jigerin shoǵyrlandyrýǵa jáne TJ aldyn alý salasyna ınvestısıa tartýǵa yqpal etetinin atap ótti.
Aıta ketý kerek, Ortalyq QR Syrtqy ister mınıstrliginde memleketaralyq organ – halyqaralyq uıym retinde taǵaıyndalǵan. Negizgi qyzmet – apattar qaýpin azaıtý, TJ aldyn alý jáne joıý, sondaı-aq klımattyń ózgerýine beıimdelý salasyndaǵy óńirlik jáne halyqaralyq yntymaqtastyqty nyǵaıtý.