Almaty ákimi Darhan Satybaldy Eýropalyq qaıta qurý jáne damý bankiniń Ortalyq Azıa jáne Mońǵolıa elderi boıynsha basqarýshy dırektory Hýseın Ozhanmen jumys kezdesýin ótkizdi. Taraptar qalalyq ınfraqurylymdy jańǵyrtý salasyndaǵy yntymaqtastyqty tereńdetý jáne birlesken jobalardy júzege asyrý máselelerin talqylady.
Darhan Satybaldy Almaty Qazaqstandaǵy ınvestısıalyq tartymdylyǵy joǵary óńirlerdiń biri bolyp qala beretinin atap ótti. Sońǵy úsh jylda megapolıske tartylǵan ınvestısıa kóleminiń jyldyq ortasha ósimi 16% boldy. Halyqaralyq Fitch agenttigi Almatynyń kredıttik reıtıńin «BBB+» deńgeıinde rastady, bul EQDB jelisi arqyly da syrttan qarjy tartýǵa qolaıly jaǵdaı jasaıdy.
Kezdesý barysynda ekologıalyq kólik jobalaryn júzege asyrýǵa arnalǵan «jasyl» oblıgasıa shyǵarý, onyń ishinde LRT qurylysy, elektroavtobýstarǵa arnalǵan ınfraqurylym qurý jáne tartqysh qosalqy stansıalardy jańǵyrtý sıaqty qazirgi jáne keleshektegi bastamalar talqylandy.
Sonymen qatar, Almatyda halyqaralyq qarjy ınstıtýttarynan tikeleı qaryz alý múmkindigi bar ekeni atap ótildi. 2025 jyly qalanyń syrtqy qaryz alý lımıti 2,3 mlrd AQSH dollaryna deıin ulǵaıtyldy, bul «jasyl» qarjylandyrý mehanızmderin belsendi engizýge jáne qalalyq ortanyń sapasyn arttyrýǵa baǵyttalǵan aýqymdy ınfraqurylymdyq jobalardy iske asyrýǵa múmkindik beredi.
Kezdesý sońynda taraptar strategıalyq áriptestikke qyzyǵýshylyq tanytyp, Almatynyń turaqty damýy aıasynda odan ári ózara is-qımylǵa daıyn ekendikterin bildirdi.