Almaty qalasy ákimdiginiń qoldaýymen megapolıstegi eń ásem ári múgedek jandardyń kirip-shyǵýyna barlyq jaǵdaı jasalǵan «Rıts Palas» saýda-oıyn-saýyq úıiniń ishindegi «Ritz Hall» banket zalynda múmkindigi shekteýli jetkinshekter men olardy baǵyp-qaǵyp otyrǵan ata-analaryna jarqyn mereke uıymdastyryldy.
– Mundaı meıramdy ekinshi ret ótkizip otyrmyz. Túrli dıagnozy bar múmkindigi shekteýli 100 balany ata-analarymen birge merekelik dastarhan basyna shaqyryp, saltanatty dýman syılap jatyrmyz. Ózderińiz de kórip otyrsyzdar, osynaý eńseli jaryq ǵımaratta kishkentaı dostarymyz kóńildi mýzykaǵa bılep, ata-analary da qosyla án shyrqap, sýretke túsip, máz-meıram. Mundaı mereke-dýman áli de jalǵasady. Barlyq balanyń ár kúni jarqyn bolsyn dep tileımiz, – deıdi Almaty qalasy Jumyspen qamtý jáne áleýmettik baǵdarlamalar basqarmasynyń basshysy Baýyrjan JAÝBASOV.
Iá, qyzyldy-jasyldy sharlarmen kómkerilgen, án-jyrǵa bólengen jap-jaryq zalda úlken-kishi birdeı merekeni sezine bildi. Balalar alyp anımator qos aıýmen kezek-kezek sýretke túsip, bı bılep, erekshe máz. «Aıýlardyń» da ózderin qyzyqtap, túrtip kórip jatqan baldyrǵandardy baýyryna basyp qushaqtap jatqan sátteri tipti áserli!
«Ritz Hall» zalynyń balalardyń kóńil kóterýine qolaıly terasasynda kishkentaı dostarymyz oıyn-saýyq baǵdarlamasyna qatysty. Konkýrstyq oıyndarǵa atsalysty. Kóńildi anımatorlar, kloýndar da balalar merekesiniń kórigin qyzdyrdy. Aspanda áýelegen sabyndy móldir kóbikterdi ustaýǵa talpynǵan baldyrǵandar da óz aldyna máz-meıram. Dekoratıvti tyshqan, qoıan, makaka, tasbaqa, qoltyraýyndar da balalardyń tańdanysyn týdyryp, bári jamyraı ustap kórip, qýanyshtary eselene tústi.
Mereke sońynda barlyq balaǵa syılyq tartý etildi.