Qazaqstan Respýblıkasy İshki ister mınıstrliginde 1 mamyr – Qazaqstan halqynyń birligi kúnine jáne Baýyrjan Momyshulynyń 115 jyldyq mereıtoıyna oraı ótkizilgen "Memlekettik til – birliktiń negizi" atty dóńgelek ústelge M.Esbolatov atyndaǵy Almaty akademıasynan polısıa maıory A.Abdýllaev qatysyp, mınıstrdiń orynbasary A.Saıtbekovtyń atynan alǵys hatpen marapattaldy, dep habarlaıdy aqshamnews.kz Polisia.kz-ke silteme jasap.
- Memlekettik tildiń mártebesin kóterý – barlyǵymyzdyń ortaq paryzymyz. Ultym uıǵyr bolǵanmen, qazaq halqymen bala kezden etene aralasyp óstim. Bala kúnimnen qazaq dostarymnyń arqasynda qazaq tilin jaqsy meńgerdim. Qazir men Maqan Esbolatov atyndaǵy Almaty akademıasynda oqý-sap bólinisiniń kýrs bastyǵynyń orynbasary bolyp qyzmet atqaramyn. Búgingi kýrsanttar – erteń elimizge qyzmet etetin ofıserler. Biz olardyń qyzmetke aralasqanda is-qaǵazdaryn memlekettik tilde saýatty oryndaýy úshin búginnen bastap qadaǵalaımyz, oqytamyz, úıretemiz. Kýrsanttardyń arasynda qazaq tilin jaqsy meńgergen ózge ult ókilderi de bar. olardyń tilge degen qurmeti men yntasyn únemi nasıhattap otyramyz, - dedi dóńgelek ústelde sóz sóılegen A.Abdýllaev.