Almaty qalasy, Almaty jáne Jetisý oblystary boıynsha qylmystyq-atqarý júıesi departamentinde osy departament Ardagerler keńesiniń uıymdastyrýymen İİM M.Esbolatov atyndaǵy Almaty akademıasynyń mamandary men ardagerleri ádep taqyrybynda leksıa-semınar ótkizdi, dep habarlaıdy Almaty-akshamy.kz.
Polisia.kz-tiń habarlaýynsha, birinshi semınarǵa Zarechnyı aýylynda ornalasqan mekemelerdiń jeke quramy qatysyp, QAJD bastyǵynyń orynbasary J.Qosjanov leksıa- semınar taqyrybynyń mańyzy týraly atap ótti. Almaty qalasynda ótken semınar kezinde QAJD bastyǵynyń orynbasary Á.Jumadıev qylmystyq-atqarý júıesi qyzmetkerleriniń antqa adal bolýdyń, qoǵam men memleket aldyndaǵy jeke jaýapkershiligin tereń uǵynýdyń ádepsiz minez-qulyqtyń aldyn alatynyn tilge tıek etti.
«Qyzmettik ádep standarttary quqyq qorǵaý organdarynyń barlyq qyzmetkerleri úshin mindetti. Ofıserlik ar-namysty bıik ustaý, qyzmettik mindetke adal bolý Qazaqstan polısıasynyń bedelin kóterýge yqpal etedi. Qazir halyq pen polısıa qyzmetkerleri arasynda ashyq dıalog ornatýǵa basa kóńil bólinýde. Bul oraıda qylmystyq-atqarý júıesi qyzmetkerlerine de júkteletin mindet zor», – dedi óz sózinde Ardagerler keńesiniń tóraǵasy E.Saǵalbaev.
Sondaı-aq departament jeke quramy jáne probasıalyq qyzmet mamandaryna Almaty akademıasynyń mamandary, zań ǵylymdarynyń kandıdaty E.Ábilezov jáne profesor A.Halmenov quqyq qorǵaý qyzmetiniń bedelin arttyrýǵa, azamattardyń memleketke degen senimin nyǵaıtýǵa yqpal etetin ádeptilik taqyrybynda leksıa oqydy.