Kitapqa Qasym-Jomart Toqaevtyń Qazaqstan halqyna arnaǵan eki Joldaýy, úsh maqalasy men 63 baıandamasy engen
QR İİM M.Esbolatov atyndaǵy Almaty akademıasynda «Qasym-Jomart Toqaev. Qazaqstan Respýblıkasy Prezıdentiniń tańdamaly eńbekteri» atty kitaptyń tusaýkeseri ótti, dep habarlaıdy Almaty-akshamy.kz.
Akademıa bastyǵynyń orynbasary polısıa polkovnıgi S.M.Kenenbaev tusaýkeser qonaqtaryna basylymnyń jaýapty redaktory, Qazaqstan-Nemis ýnıversıteti Halyqaralyq jáne aımaqtyq yntymaqtastyq ǵylymı-zertteý ınstıtýtynyń (IMIRS) dırektory, profesor, saıasatker jáne memleket qaıratkeri Bolat Sultanovty tanystyrdy.
Bolat Klychbaıuly Akademıa ujymyna arnaǵan quttyqtaý sózinde qıyn-qystaý qańtar kúnderinde Prezıdentke qoldaý kórsetkenderi úshin polısıa qyzmetkerlerine sheksiz alǵysyn bildirdi.
«Qasym-Jomart Toqaev. Qazaqstan Respýblıkasy Prezıdentiniń tańdamaly eńbekteri» kitabynda elimizde bolyp jatqan ıgilikke baǵyttalǵan ózgerister, Memleket basshysy qolǵa alyp jatqan basymdyqtar men nátıjeli qadamdar, jańa Qazaqstandy qurý baǵytyndaǵy reformalar strategıasy týraly naqty aıtylǵan.
CNPC International Kazakhstan LTD qoldaýymen Qazaqstan-Nemis ýnıversıtetiniń Halyqaralyq jáne aımaqtyq yntymaqtastyq ǵylymı-zertteý ınstıtýty (IMIRS) basyp shyǵarǵan jınaqqa Qazaqstan Respýblıkasynyń Prezıdenti Q-J. Toqaevtyń 2019 jyldyń 20 naýryzy men 2021 jyldyń 30 sáýiri aralyǵynda jarıalanǵan eńbekteri toptastyrylǵan.
Memleket basshysynyń kitaptaǵy 68 eńbeginiń ishinde Prezıdent Q-J. Toqaevtyń Qazaqstan halqyna arnaǵan eki Joldaýy, úsh maqalasy men 63 baıandamasy, sondaı-aq elimizdiń ishki jáne syrtqy saıasatyn jáne eldi áleýmettik-ekonomıkalyq turǵydan damytý týraly úndeýleri men málimdemeleri bar.
Atalǵan kitaptyń jaryqqa shyǵýy ǵylymı ortanyń – tarıhshylar men saıasattanýshylardyń, sarapshylardyń jáne ulttyq tarıh, halyqaralyq qatynastar, elimizdiń syrtqy jáne ishki saıasaty máselelerimen aınalysatyndardyń qyzyǵýshylyǵyn týdyrýda. Qazaqstannyń jańa tarıhynan málimet beretin, dokýmentaldy derekkózderge negizdelgen jınaq QR İİM Almaty akademıasynyń profesorlyq-oqytýshylyq quramy men tyńdaýshylarynyń da suranysyna ıe bolary sózsiz.