Almatydaǵy Belsendi uzaq ómir súrý ortalyǵynda qurylǵan «Almaty ájeleri» jasy úlken sángerler modelder Birikken Arab Ámirlikterine sapar shekti, dep habarlaıdy aqshamnews.kz.
Dýbaıdaǵy Toda ınovasıalyq teatrynda rejıser ári prodúser Olga Sapojnıkova túsirgen «Uzaq ǵumyr» atty derekti fılmniń tusaýy kesildi. Bul fılmniń basty keıipkerleriniń biri – «Almaty ájeleri» tobynyń músheleri.
Fılmniń tusaýkeseri aıasynda almatylyq zeınetker ájeler «Aq kerbez» sán toptamasyn usynyp, uzaq ómir súrý, densaýlyqty saqtaý jáne kez kelgen jasta optımısik kózqarasty ustaný qupıasyn bólisti. Sán kórsetilimi keshtiń jarqyn sátine aınalyp, sulýlyq, dástúr men zamanaýılyqtyń úılesimin kórsetti.
İs-sharaǵa Qazaqstannyń BAÁ-degi elshiliginiń ókilderi, qalalyq ákimdik, mádenıet jáne densaýlyq saqtaý salasynyń qaıratkerleri, sondaı-aq belsendi uzaq ómir súrý taqyrybyna qyzyǵýshylyq tanytqan kóptegen kórermen qatysty. Sonymen qatar, «Almaty ájeleri» Abý-Dabıdegi Lývr mýzeıinde de óner kórsetti.
Almatynyń Belsendi uzaq ómir súrý ortalyǵynyń qatysýshylary kórermenderdi óziniń náziktigimen, stılimen jáne ómirlik qýatymen tánti etti.
Fılmniń tusaýkeseri men merekelik is-shara Qazaqstan men BAÁ arasyndaǵy mádenı baılanystardy nyǵaıtyp qana qoımaı, halyqaralyq aýdıtorıaǵa belsendi jáne densaýlyqqa paıdaly ómir saltyn ustanýdyń qanshalyqty mańyzdy ekenin kórsetti.
Aıta keteıik, Belsendi uzaq ómir súrý ortalyqtary Almatynyń barlyq aýdanynda jumys isteıdi. Qalada 15 ortalyq bar: atap aıtqanda, úsh bólimshesi bar qalalyq belsendi uzaq ómir súrý ortalyq jáne úkimettik emes uıymdardyń 11 fılıaly.
Sońǵy eki jylda bul ortalyqtarǵa kelýshiler sany 7 ese artty: 2022 jyly 833 adam bolsa, 2024 jyly 6 073 adamǵa jetti. Kórsetiletin qyzmetter sany da 26 esege ósip, 12 myńnan 313 myńnan astamǵa ulǵaıdy.
Belsendi uzaq ómir súrý ortalyqtary 40-tan astam tegin qyzmet túrin usynady, onyń ishinde bilim berý baǵdarlamalary, trenıńter, dene shynyqtyrý, ıoga, bı, sondaı-aq shyǵarmashylyq sheberhanalar bar.