Almaty №4 qalalyq klınıkalyq aýrýhanasynda «Ómirge úmit syıla» qaıyrymdylyq naýqany aıasynda Donor kúni ótti.
İs-shara Respýblıka kúnine oraı uıymdastyrylyp, donorlyq mádenıetti damytý men qan quıýdy qajet etetin naýqastardy qoldaýǵa baǵyttaldy.
Naýqanǵa aýrýhananyń 60 qyzmetkeri - dárigerler, medbıkeler jáne ákimshilik bólim qyzmetkerleri qatysty.
Barlyǵy 30 lıtrden astam qan jáne onyń komponentteri jınaldy. Qan aýyr jaraqat alǵan, anemıa, otadan keıingi asqyný jáne donorlyq kómekti qajet etetin ózge de jaǵdaımen kúresip jatqan naýqastardy aman alyp qalýǵa baǵyttalatyn bolady.
«Biz úshin donor bolý - jaı ǵana rásim emes, kásibı ári adamı boryshymyzdyń kórinisi. Árqaısymyz syn saǵatta jatqan naýqas úshin bir birlik qannyń qanshalyqty mańyzdy ekenin jaqsy túsinemiz», - deıdi Pasıentterdi qoldaý jáne ishki aýdıt qyzmetiniń jetekshisi Dıas Daýletbaev.
Qan tapsyrar aldynda barlyq qatysýshy terapevtiń qabyldaýynan ótip, qan qysymyn ólshetip, zerthanalyq tekserýden ótti. İs-shara Almaty Qalalyq qan ortalyǵy mamandarynyń baqylaýymen uıymdastyryldy.
№4 qalalyq klınıkalyq aýrýhanada mundaı is-sharany ótkizý ıgi dástúrge aınalǵan. Klınıka basshylyǵynyń aıtýynsha, ujymdyq donorlyq ózara qoldaý mádenıetin qalyptastyryp, árbir adamnyń ómirdi qutqarýǵa úles qosyp jatqanyn sezindiredi.
«Ár tamshy qan - bir ómirge múmkindik. Donor kúni - dál qazir ómir úshin kúresip jatqan jandarǵa úmit syılaýdyń bir joly», - dep atap ótti №4 QKA ujymy.
Klınıka donorlyq naýqandy turaqty túrde jalǵastyrýdy josparlap otyr.