Almatydaǵy Dostyq úıinde «Qyran elim – Qazaqstanym» atty ǵylymı-tájirıbelik konferensıa ótti.
Jıyn Respýblıka kúni men Qazaqstan Respýblıkasynyń Memlekettik egemendigi týraly Deklarasıanyń qabyldanǵanyna 35 jyl tolýyna arnaldy.
İs-sharanyń maqsaty – Memlekettik egemendik týraly Deklarasıanyń tarıhı mańyzyn aıqyndaý, qazaqstandyq patrıotızmdi nyǵaıtý, ulttyq qundylyqtardy dáripteý jáne eldiń birligi men táýelsizdigi ıdeıalaryn qoǵamda odan ári ornyqtyrý.
Konferensıaǵa Qazaq KSR Joǵarǵy Keńesiniń XII shaqyrylym depýtattary, qoǵam jáne memleket qaıratkerleri, Almaty qalalyq máslıhatynyń depýtattary, qoǵamdyq keńes músheleri, etnomádenı birlestikter men azamattyq qoǵam ókilderi qatysty.
Almaty qalasy ákiminiń orynbasary Azamat Qaldybekov óz sózinde tarıhı jadyny saqtaýdyń mańyzdylyǵyna toqtaldy:
– Búgin biz elimizdiń tarıhyndaǵy asa mańyzdy kezeńdi eske alý úshin jınalyp otyrmyz. 1990 jyldyń 25 qazanynda Memlekettik egemendik týraly Deklarasıa qabyldandy. Bul qujat táýelsiz memlekettiń qalyptasý jolyndaǵy alǵashqy ári sheshýshi quqyqtyq akt boldy.
Búgingi mindetimiz – patrıottyq sanany kúsheıtip, ulttyq qundylyqtardy dáripteý jáne qoǵamdy el birligi men táýelsizdigi ıdeıalarynyń aınalasyna biriktirý. Tek birlik arqyly ǵana egemendiktiń muratyn laıyqty jalǵastyryp, halqymyzdyń órkendeýin qamtamasyz ete alamyz. Barshańyzdy Respýblıka kúnimen jáne Deklarasıanyń qabyldaný mereıtoıymen shyn júrekten quttyqtaımyn! Elimizge bereke, birlik jáne tabys tileımin, – dedi ol.
Sondaı-aq, is-sharada mańyzdy sóz sóılegen akademık, belgili ǵalym Asqar Jumadildaev bul kúnniń óz ómiri men kásibı jolynda erekshe mańyzǵa ıe ekenin atap ótti:
– Táýelsizdik degenimiz – tek saıası erkindik emes, ol – jaýapkershilik. Bilim men ǵylymǵa, keler urpaqtyń bolashaǵyna degen jaýapkershilik.
Men úshin bul mereıtoıdyń orny bólek. Deklarasıa qabyldanǵan jyly eń jas ǵylym doktory retinde jas ǵalymdar keńesiniń atynan depýtattyqqa alǵash saılandym. El tarıhy dáleldegendeı, tek bilim men ıntellektke súıenip, dástúr men ınovasıany ushtastyrý arqyly ǵana egemendigimizdi nyǵaıta alamyz. Sondyqtan búgingi konferensıa tek ótkenge taǵzym emes, bolashaqqa baǵyttalǵan jańa ıdeıalar men bastamalardyń bastaýy bolsyn, – dedi Asqar Jumadildaev.
İs-shara aıasynda Qazaqstan Respýblıkasy Prezıdenti Arhıvi arnaıy taqyryptyq kórme uıymdastyrdy. Onda Memlekettik egemendik týraly Deklarasıanyń qabyldanýy men Táýelsiz Qazaqstannyń qalyptasý kezeńderine qatysty biregeı qujattar, fotosýretter jáne sırek materıaldar qoıyldy.
«Qyran elim – Qazaqstanym» konferensıasy táýelsizdik, birlik jáne jasampazdyq ıdeıalaryn dáripteı otyryp, urpaqtar sabaqtastyǵyn pash etken taǵylymdy is-shara boldy.