Almatyda ótken Djennıfer Lopestiń konserti qorytyndylandy. Ortalyq stadıondaǵy aýqymdy shoýǵa 27 myń kórermen jınalǵan. Onyń shamamen 7 myńy TMD elderinen bastap AQSH, Kanada, Túrkıa, Japonıa, Qytaı, Germanıa, Ulybrıtanıa, Fransıa sekildi 35 memleketten arnaıy kelgen.
Bılet baǵasy 40 myńnan 180 myń teńgege deıin jetken. Uıymdastyrýshylardyń aldyn ala jasaǵan esebi boıynsha bul is-sharadan búdjetke túsetin salyq kólemi 600 mln teńge shamasynda bolmaq.
Up All Night týry aıasynda alty apta boıy álem elderinde Djennıfer Lopestiń konsertterinde bas rejıssór bolǵan Krıstıan Lamb pen Almaty, Astana jáne Tashkent qalalarynda artıspen birge jumys istegen tehnıkalyq dırektor Grıgorıı Antropov Almatydaǵy sahnanyń, shoý ótken alańnyń daıyndyǵyn barlyq alańdardyń ishindegi eń úzdigi dep atap, uıymdastyrýshylar eńbegin joǵary baǵalady. Bul týraly First Media Group ókili málimdedi.
«Álemdik deńgeıdegi juldyzdyń komandasynan mundaı joǵary baǵa alý bizge úlken shabyt beredi. Djennıfer Lopestiń konsertin joǵary deńgeıde ótkize alǵanymyzǵa qýanyshtymyz.
Biz óz tarapymyzdan konsertten keıin taldaý jumystaryn júrgizdik. Aldaǵy ýaqytta eskerip, jetildirýge bolatyn tustary da bar ekenin bilemiz. Sol úshin keleshekte odan da joǵary deńgeıge shyǵý maqsatynda naqty jospar quryp jatyrmyz. Konsertke kelip, pikir bildirgen barlyq kórermenge alǵys aıtamyz», — dedi First Media Group basqarýshy dırektory Álfıa Nurǵumarova.
İs-sharanyń qala ekonomıkasyna tıgizgen áseri de aýqymdy. Mastercard tólem júıesiniń deregine súıensek, sheteldik týrıser Almatyda orta eseppen úsh jarym kún aıaldap, táýligine shamamen 440 dollardy qonaqúı, tamaq, kólik, ekskýrsıa jáne saýdaǵa jumsaıdy. Konsert kúnderi tek sheteldik qonaqtar qalaǵa shamamen 5 mıllıard teńgeden astam tabys ákeldi.
Bul ýaqytta meıramhanalar, kofehanalar, qonaqúıler men túrli kólik kompanıalary da qosymsha paıda tapty. Taǵy bir mysal, konsert ótken kúni stadıon aýmaǵyndaǵy fýd-kort 15 mıllıon teńge tabys tapqan.
Týrızm basqarmasynyń paıymdaýynsha, kórermenderdiń shyǵyny men janama kiristerdi qosa eseptegende, konsertten qalaǵa túsken tabys aınalymy 10 mıllıard teńgeden asady. Mundaı mádenı is-sharalar qala qazynasyna qomaqty kiris ákelip qana qoımaı, Almatynyń týrısik tartymdylyǵyn arttyryp, ony álemdik gastról kartasyndaǵy mańyzdy ortalyq retinde nyǵaıtady.