Almatyda «Qazaqstannyń úzdik taýary» baıqaý-kórmesiniń óńirlik kezeńi ótti.
Abaı alańynda, Respýblıka saraıynyń aldynda «Qazaqstannyń úzdik taýary» respýblıkalyq baıqaýynyń óńirlik kezeńi ótti. İs-sharaǵa Almaty ákimi Darhan Satybaldy, «Atameken» ulttyq kásipkerler palatasy prezıdıýmynyń tóraǵasy Raıymbek Batalov, sondaı-aq qala kásipkerleri qatysty.
Bul baıqaý 2006 jyldan beri Memleket basshysynyń tapsyrmasymen ótkizilip keledi. Maqsaty – otandyq óndirýshilerdi qoldaý, shaǵyn jáne orta bıznesti damytý, qazaqstandyq ónimdi tutyný mádenıetin qalyptastyrý jáne ishki naryqty sapaly, básekege qabiletti taýarmen qamtamasyz etý.
Almaty ákimi Darhan Satybaldy qatysýshylardy quttyqtap, baıqaýdyń kásipkerlikti qoldaýdaǵy mańyzyna toqtaldy. Ákimniń aıtýynsha, óńirlik kezeńniń jeńimpazdary ýaqyt synynan ótken ónim sapasynyń moıyndalýyna qol jetkizip qana qoımaı, Almatyny ulttyq deńgeıde tanystyrý jaýapkershiligin de arqalaıdy.
«Qurmetti qatysýshylar men jeńimpazdar! Sizdermen búgin osynda júzdeskenime qýanyshtymyn. «Qazaqstannyń úzdik taýary» baıqaýy Almatyda ıgi dástúrge aınaldy. Jeńis jaı ǵana marapat emes, bul eń áýeli sizderdiń ónimderińizdiń joǵary sapasyna berilgen baǵa. Sizderdiń taýarlaryńyzdy almatylyqtar ǵana emes, elimizdiń seriktesteri de tańdaıdy. Sizder ulttyq kezeńde qalamyzdy namysyn laıyqty qorǵaısyzdar dep senemin. Almaty eldegi kásipkerlik damýynyń naǵyz ortalyǵy, árqaısyńyz "Qazaqstanda jasalǵan" brendine úles qosyp otyrsyzdar», – dedi Darhan Satybaldy.
Baıqaýdyń jeńimpazdary:
- Óndiristik maqsattaǵy úzdik taýarlar: «KazMedAspap» JSHS, «QAZAQ TIGIN FABRIKASY» JSHS, «IT&M» JSHS
- Halyq tutynatyn úzdik taýarlar: «KSC-PLAST» JSHS, «PAPIRONE» JSHS, «Aigul Line» JSHS
- Úzdik azyq-túlik taýarlary: «BIJAN et óńdeý zaýyty» JSHS, «Jıgalma» JSHS, «GOJI» JSHS
- Arnaıy nomınasıa «Sala kóshbasshysy – qalanyń seriktesi»: «Mega beton plús» JSHS, «Qazlegprom-Almaty» JSHS, «Astana Motors» kompanıalar toby, «MARCHALL» JSHS, «Aı-Hanym» JK (Qulpynai), «Le Porte M» JSHS, «Xfinity Solutions» JSHS, «Qazaqstandyq qubyr júıeleri» JSHS, «TELLI ONDIRIS» JSHS, «TEPLOSTIL» JSHS, «BLS GROUP» JSHS, «City Stone» JSHS, «Lemonadoff Food» JSHS, «KNG.PRO» JSHS.
Óńirlik kezeńniń jeńimpazdary respýblıkalyq fınalda baq synap, «Qazaqstannyń úzdik taýary» ataǵyna úmitker atanady. İs-shara barysynda ónimder kórmesi, konserttik baǵdarlama men marapattaý rásimi ótti.
Sonymen birge «Bir aýyl – bir ónim» jobasy aıasynda almatylyq óndirýshilerdiń jármeńkesi uıymdastyryldy. Onda 40-qa jýyq shaǵyn jáne orta bıznes ókili men jeke kásipker ónimderin usyndy. Jármeńke qorytyndy boıynsha 10 úzdik óndirýshi anyqtalyp, olar óńirlik Brend komıtetiniń irikteý kezeńine joldama aldy.