S-Group jáne Sincere System Group JSHS qarjy pıramıdasynyń qyzmeti týraly is sotqa jiberildi.
Shetelge qashyp ketken kúshdiktilerge syrttaı "kúzetpen ustaý" túrindegi bultartpaý sharasy qoldanyldy, dep habarlaıdy almaty-akshamy.kz.
Qalalyq prokýratýranyń málimetinshe, 23 aqpanda Almaly aýdanynyń soty J. Sanaevaǵa, T. Kovalevıchke jáne F. Áıeshke qatysty qylmystyq quqyqbuzýshylyq jasaýǵa járdemdesý, naqtyraq aıtqanda "Sincere System Group", "S-Group" JSHS qarjylyq (ınvestısıalyq) pıramıdasyn qurý faktisi boıynsha qylmystyq isti qaraýǵa kiristi.
"Tergeý organy joǵaryda atalǵan adamdar, zańsyz materıaldyq baıý úshin salymshylardy jappaı tartý qajettigin sezine otyryp, "WhatsApp" jáne "Telegram" áleýmettik jelileri arqyly iske asyrylyp jatqan jalǵan ınvestısıalyq baǵdarlamalar týraly jalǵan aqparat taratýdy júzege asyryp, halyqtyń basym kópshiligine "S-Group" jobasynyń qyzmeti týraly jalǵan aqparat bergenin jáne áleýetti salymshylardy aqsha qarajatyn salý týraly úgittegenin anyqtady", - delingen vedomstvo habarlamasynda.
QR Qarjy naryǵyn retteý jáne damytý agenttiginiń jaýabyna sáıkes "Sincere System Group" JSHS-da qarjy pıramıdasy qyzmetiniń belgileri bar.
"Kompanıanyń qyzmeti, baǵdarlamaǵa qatysýshynyń kirisin basqa qatysýshylardy tartý arqyly salymdar esebinen qalyptastyrýǵa, qatysýshylardy ıerarhıalyq qurylym boıynsha tartýǵa, nazar aýdarý maqsatynda aýqymdy jarnamaǵa baǵdarlanýǵa baǵyttalǵanyn eskere otyryp, bul qarjylyq pıramıda ekenin ańǵarýǵa bolady.Baıandalǵandy eskere otyryp, QR azamattaryn joǵaryda atalǵan kompanıamen kez kelgen qarjylyq ózara is-qımyl jasamaýdy eskertemiz", - dep eskertti prokýratýra ókilderi.
Sonymen qatar is materıaldarynda memlekettik shekara asqan, qylmystyq qýdalaýdan jasyrynyp júrgen V. Mashýrovqa (Ýkraına azamaty), M.N. Avazovaǵa jáne R.R. Tajbenovke qatysty is bólektelinip alyndy. Osy adamdarǵa qatysty syrttaı "kúzetpen ustaý" túrindegi bultartpaý sharasy qoldanyldy. Sotqa deıingi tergep-tekserý materıaldaryna sáıkes "Sincere System Group" qarjylyq pıramıdasynyń uıymdastyrýshylary retinde V. Mashýrovtyń, M. Avazovanyń, R. Tájbenovtyń qatysy bar ekeni anyqtaldy.