Premer-Mınıstr Álıhan Smaıylov mashına jasaýdy damytý máseleleri jóninde keńes ótkizdi.
Indýstrıa jáne ınfraqurylymdyq damý mınıstri Qaıyrbek Óskenbaev óz baıandamasynda 2022 jyldyń 6 aıynyń qorytyndysy boıynsha mashına jasaý óndirisi ótken jyldyń sáıkes kezeńimen salystyrǵanda 37%-ǵa (aqshalaı balamada) óskenin habarlady. Salaǵa tartylǵan ınvestısıalar kólemi 23%-ǵa ulǵaıdy, dep habarlaıdy Almaty-akshamy.kz.
Keńes barysynda «Qazaqstan mashına jasaýshylar odaǵy» ZTB basqarma tóraǵasy Meıram Pishembaev otandyq óndiristi qoldaýdyń birqatar baǵyty boıynsha sala ókilderiniń usynystaryn aıtty.
Óńdeý sektorynyń kásiporyndaryn qoldaý boıynsha jumys sheńberinde shıkizat, materıaldar men quramdas bólshekterdi ımporttaý kezinde esepke jatqyzý ádisimen qosylǵan qun salyǵyn tóleý tetigin qoldaný 2024 jylǵa deıin uzartylǵany atap ótildi. Bul rette ınvestısıalyq jobalardy iske asyrý úshin qajetti metal ónimderin QQS osy ádispen tólenetin ımporttalatyn taýarlar tizbesine qosý usynyldy. Sondaı-aq ónimdi eksporttaý kezinde QQS-ny jedel qaıtaratyn óńdeýshi sektor kásiporyndaryn qamtýdy keńeıtý usynylady.
Premer-Mınıstr atalǵan usynystardy qoldap, tıisti memlekettik organdarǵa qajetti sheshimderdiń jobalaryn engizýdi tapsyrdy.
«Biz otandyq óndiristiń ósip, órkendeýine múddelimiz. Ol úshin qoldaý sharalarymen qamtý keńeıtiledi. Sondaı-aq satyp alýlar kezinde jergilikti qamtýdy ulǵaıtý máselelerine erekshe nazar aýdarý qajet», - dedi Álıhan Smaıylov.
Premer-Mınıstr osy baǵyttar boıynsha tıisti memlekettik organdarǵa birqatar tapsyrma berdi.