Microsoft korporasıasy Qazaqstanda ornalasatyn mýltıaımaqtyq hab ashýǵa daıyn
Qazaqstan 2025 jylǵa qaraı kem degende 100 myń joǵary bilikti IT-maman daıarlaýdy josparlap otyr. Bul týraly Premer-Mınıstr Álıhan Smaıylov Almatyda ótken «Eýropalyq odaq – Ortalyq Azıa» ekinshi ekonomıkalyq forýmynda málim etti, dep habarlaıdy Almaty-akshamy.kz QazAqparatqa silteme jasap.
Premerdiń aıtýynsha, sıfrlandyrý – ekonomıkany damytýdyń negizgi draıverleriniń biri. Qazaqstan ózine Eýrazıa keńistigindegi eń iri sıfrlyq habtardyń birine aınalý strategıalyq mindetin qoıdy.
«Byltyr elimiz Úkimetter damýynyń BUU ındeksinde 28-shi orynǵa ıe boldy. Bul – óńirdegi jáne TMD elderi arasyndaǵy eń joǵary kórsetkish. Qazaqstanda sıfrlyq transformasıany damytý úshin qolaıly jaǵdaılar jasalyp jatyr. Biz bank júıesin qurdyq. Sıfrlyq komersıa da qarqyndy damyp keledi», - dedi Úkimet basshysy.
Álıhan Smaıylov Microsoft korporasıasy Qazaqstanda ornalasatyn mýltıaımaqtyq hab ashýǵa daıyn ekenin jetkizdi. Ol Ortalyq Azıa elderinen bólek, Ázirbaıjan, Armenıa, Grýzıa jáne Pákistan elderin de qamtıtyn bolady.
«Osy turǵyda Qazaqstan «Global Gateway», «Team Europe» jobalaryna jáne Eýropalyq odaqtyń Ortalyq Azıamen sıfrlyq baılanys jónindegi bastamasyna belsendi qatysýǵa daıyn. Qazaqstan qazirdiń ózinde eýropalyq spýtnıktik kompanıalarǵa aımaqtyq hab qurý úshin alań usyndy. 2025 jylǵa qaraı biz kem degende 100 myń bilikti IT-mamanyn daıyndaýdy josparlap otyrmyz. Osy múmkindikti paıdalana otyryp, eýropalyq IT ýnıversıtetterin Qazaqstanda óz fılıaldaryn ashýǵa shaqyramyn. Osylaısha, Astana Hub tehnoparki belsendi aımaq retinde yńǵaıly alańǵa aınala alady», - dedi Álıhan Smaıylov.