Álıhan Smaıylov mundaı áleýmettik jobalarǵa jeke ınvestısıalardy tartý asa mańyzdy ekenin atap ótti
QR Premer-Mınıstri Álıhan Smaıylov Almatyǵa jumys sapary aıasynda Juqpaly aýrýlar ulttyq ǵylymı ortalyǵyna bardy, dep habarlaıdy Almaty-akshamy.kz Úkimettiń saıtyna silteme jasap.
350 tósek-orynǵa arnalǵan Juqpaly aýrýlar ulttyq ǵylymı ortalyǵynyń qurylysyn 2023 jyldyń sońynda aıaqtaý josparlanyp otyr.
Stasıonardan basqa, onda ǵylymı-zertteý jáne oqý ortalyqtary, zerthanalar, medısınalyq ýnıversıtetterdiń kafedralary jáne t. b. ornalasatyn bolady.
Jańa ortalyqta juqpaly aýrýlar, pýlmonologıa jáne ftızıatrıa salasynda sapaly medısınalyq kómek kórsetiledi, zertteýler júrgizilip, mamandar oqytylady, ozyq medısınalyq tehnologıalar paıdalanylyp, dárilik preparattar synalady.
Budan basqa jańa nysan bazasynda respýblıkadaǵy epıdemıologıalyq ahýaldy baqylaý úshin ahýaldyq ortalyq ashý josparlanýda.
Premer-Mınıstr DDU málimetteri boıynsha jyl saıyn 2 mlrd adam juqpaly aýrýlarmen aýyryp, 50 mln-nan astam adam qaıtys bolatynyn aıtty.
«Ortalyqtyń ashylýy týberkýlezden ǵana emes, jalpy basqa da juqpaly aýrýlardan, onyń ishinde asa qaýipti aýrýlardan bolatyn syrqattanýshylyq pen ólim-jitimdi azaıtýǵa múmkindik beredi. Almaty ákimdigi ortalyqty ashý máselesin erekshe baqylaýda ustaýy qajet», — dedi Álıhan Smaıylov.
Almaty ákiminiń orynbasary Ásem Núsipova densaýlyq saqtaý salasyn damytý aıasynda 2025 jylǵa deıin polıortalyqty qaǵıdaty boıynsha 16 emhana salý josparlanyp otyrǵanyn, onda respýblıkada alǵash ret MSAK biryńǵaı standarty engiziletinin baıandady.
Bul 300 myńnan astam adam úshin alǵashqy medısınalyq qyzmetterdi qoljetimdi etedi.
Budan basqa, 2030 jylǵa deıin qoldanystaǵy 25 kóp salaly jáne mamandandyrylǵan stasıonardyń ınfraqurylymy kezeń-kezeńmen jańǵyrtylady.
Sondaı-aq 5 kópsalaly stasıonar (neırohırýrgıa, ınsýlt ortalyǵy, endoprotezdeý, travmatologıa jáne ortopedıa) bazasynda arnaıy ortalyqtar qurý jáne basqa da birqatar qadamdy iske asyrý josparlanýda.