«Alataý Aqparat» medıaholdıngi: jyl qorytyndysy
Qazaqstandaǵy buqaralyq aqparat quraldarynyń ishinde ózindik orny bólek, salmaqty ujymdardyń biri – «Alataý Aqparat» JSHS. Almaty shaharynyń shamshyraǵyndaı bolǵan qara shańyraqty sońǵy 3 jyl kóleminde esimi elge belgili medıamenedjer Tólemis Kúlmuhamedov basqardy. Bıik zerde men parasat-paıym ıesi Tólemis Baqtybaıulynyń medıaholdıngke sińirgen eńbegi orasan zor.
«Alataý Aqparat» medıaholdıngine dırektor bolyp kelisimen, Tólemis Baqtybaıuly «Almaty aqshamy» jáne «Vechernıı Almaty» gazetteriniń basyn biriktirip, yntymaǵy berik, birligi jarasqan úlken ujymǵa aınaldyra bildi.
«Almaty aqshamy» jáne «Vechernıı Almaty» gazetteri megapolıstiń qym-qýyt tirshiligin oqyrmanǵa jetkizip, qalalyqtarmen qoıan-qoltyq jumys istep keledi. Halyqtyń múddesi úshin qyzmet etetin qos ujymnyń qyzmetkerleri men jýrnalıser qaýymy bir atanyń balasyndaı, bir qoldyń salasyndaı jumylyp jumys isteıdi. Kóregen basshy gazet qyzmetkerleriniń bir-birimen aqparat almasyp, birlesip jumys isteýi úshin barynsha jaǵdaı jasady. Basshynyń muryndyq bolýymen uıymdastyrylǵan «dóńgelek ústelder», belgili tulǵalarmen kezdesýler, merekelik jıyndar, tabıǵat aıasyndaǵy demalys qos gazettiń shyǵarmashylyq ujymyn jaqyndata tústi.
Máselen, byltyr «Vechernıı Almaty» gazetiniń 85 jyldyq mereıtoıy keń kólemde atalyp ótti. Mereıtoıdy joǵary deńgeıde atap ótýge eki ujym da atsalysty. Ramazan aıyndaǵy aýyzashar, Qurban aıt, Naýryz merekelerin árdaıym birlesip ótkizýdi úlken ujym dástúrge aınaldyrdy.
Júregi keń, talaby bıik Tólemis Baqtybaıuly ujymda qyzmet etetin ár adamǵa kóńil bólip, árkimniń shyǵarmashylyǵyna den qoıdy. Sońǵy úsh jylda redaksıada jumys isteıtin jas jýrnalıserdiń qatary kóbeıdi. Negizgi mamandyǵy muǵalim bolǵandyqtan bolsa kerek, Tólemis Baqtybaıuly jastarǵa únemi qoldaý bildirip, baǵyt-baǵdar berip otyrdy. Jaǵdaıyn aıtyp, aldyna barǵan qyzmetkerdiń meselin qaıtarǵan emes. Basshynyń abyroı-bedeliniń bıiktigi ujymnyń oǵan degen qurmetinen, syılastyǵynan kórinedi. Basshy retinde meıirimdi, biraq ádil adam ár qyzmetkerdiń eńbegin baǵalap, jýrnalıserdiń qalamaqysyn joǵarylatty. Jalpy, qyzmetkerlerdiń jalaqysyn úsh ret ósirdi. Eńbegine qaraı, aǵa býyn jýrnalıserdi de, jastardy da memlekettik marapattarǵa usynyp otyrdy. Qalalyq, halyqaralyq jarystarǵa qatysqan jýrnalıserge qoldaý bildirdi.
Alash ardaqtysy Álıhan Bókeıhanovtyń «Ultqa qyzmet etý bilimnen emes, minezden» degen mazmuny tereń sózi osy Tólemis Baqtybaıuly syndy adamdarǵa qatysty aıtylsa kerek. Óıtkeni, ol qazaqy tanym, dástúr, din men dil, ulttyq ótkir máselelerdi janyn salyp kótere bildi. Basshy retinde jýrnalıske bergen tapsyrmasynyń sońyna deıin jetkizilýin qatty qadaǵalady. Ulttyq múdde synǵa túsken kezderde kez kelgen iske bilek sybana kiristi.
«Kóregen basshy eldi ósiredi» demekshi, Tólemis Baqtybaıuly «Alataý Aqparat» medıaholdınginiń shyǵarmashylyǵyn ǵana emes, sharýashylyǵyn da birshama kóterdi. Shevchenko kóshesiniń boıyndaǵy «Almaty aqshamy» men «Vechernıı Almaty» jáne saıt redaksıalary ornalasqan ǵımarat biraz jyldan beri jóndeý kórmeı, tozyp turǵan edi. Sońǵy birneshe jylda ǵımarattyń ishi-syrty tolyq jóndeýden ótip, bólmeleri jańaryp, jarqyrap qaldy. Gazettiń redaksıasy qajetti jańa tehnıkalarmen qamtamasyz etildi.
Ótken jyldyń qorytyndysy esebinde «Alataý Aqparat» medıaholdıngi atqarǵan jaqsy issharanyń birin aıta keteıik. Máselen, mundaı istiń biri «Alataý Aqparat» kitaphanasy» aıdarymen Qazaqstan Jýrnalıser akademıasynyń prezıdenti, profesor Saǵymbaı Qozybaevtyń «Daıdıdaý» degen atpen shyqqan esseler jınaǵynan bastaldy. Bul oraıda Oljas Súleımenov, Murat Áýezov jáne basqa da belgili qazaqstandyq avtorlardyń kitaptaryn shyǵarý josparlanǵan.
Mundaı kitaptar serıasyn shyǵarý ıdeıasy «Alataý Aqparat» medıaholdınginiń bas dırektory Tólemis Kúlmuhamedovke tıesili. «Kitap shyǵarý ıdeıasyn maǵan Shyǵarmashylyq damý jónindegi keńesimiz usyndy, oǵan belgili tulǵalar – keńes tóraǵasy Oljas Súleımenov, sondaı-aq Murat Áýezov, Saǵymbaı Qozybaev, Seıitqazy Mataev kiredi», – dedi Tólemis Qulmuhamedov.
Tólemis Baqtybaıuly «Alataý Aqparat» medıaholdıngine dırektor bolyp kelgenge deıin L.Gýmılev atyndaǵy Eýrazıa ulttyq ýnıversıtetiniń Integrasıa ınstıtýtyn basqarǵan. Jalpy, eńbek jolynda ol 20 jyldan astam ýaqyt medıa salasynda jetekshilik qyzmetterdi atqardy. «Ekspress K», «Novoe pokolenıe», «Kazahstanskaıa pravda», «Lıter» basylymdarynda, «Vremá», «Arna Medıa» jáne «Nur Medıa» holdıńterinde jetekshilik qyzmetter atqardy.
Bıyl «Alataý Aqparat» JSHS dırektory Tólemis Kúlmuhamedov qurmetti zeınet demalysyna shyqty. Bedeli bıik, abyroıy asqaq Tólemis Baqtybaıulyna zor densaýlyq, uzaq ǵumyr tileımiz!
«ALATAÝ AQPARAT» JSHS UJYMY.