Abaı atyndaǵy QazUOBT orkestriniń ártisteri «Tórteýge jaǵymdy áńgime» avtorlyq baǵdarlamasyn oryndady.
Alǵys aıtý kúnine oraı «Pana» áleýmettik beıimdeý ortalyǵynda «GATOB QUARTET» ishekti aspaptar kvarteti qaıyrymdylyq konsertin ótkizdi, dep habarlaıdy Almaty-akshamy.kz
Abaı atyndaǵy QazUOBT orkestriniń ártisteri Ásem Qalman, Oksana Nurshaeva, Nurlan Saǵymbaev jáne Aıdar Quspanov jurtshylyq súıip tyńdaǵan toptyń «Tórteýge jaǵymdy áńgime» avtorlyq baǵdarlamasyn oryndady. Merekelik konsertte óńdeýdegi ataqty kúıler men qazaq kompozıtorlarynyń ánderi, kvartettiń tanymal klasıka men HH ǵasyr shyǵarmalary oryndaldy. Ahmet Jubanov pen Latıf Hamıdıdiń «Abaı» operasyndaǵy áıgili «Qarlyǵash» áni Astor Pássollanyń shyǵarmalarymen qatar júrdi. «Don Jýan» operasynan tanys áýen baǵdarlamada Volfgang Amadeı Mosarttyń shyǵýyn belgiledi, al bul tańǵajaıyp mýzykalyq kaleıdoskoptyń tek úzindileri ǵana.
Abaı atyndaǵy QazUOBT ishekti aspaptar kvarteti – ózindik erekshe daralyǵy bar qalyptasqan ujym. Orkestr ártisteri teatr qoıylymdarynyń baı repertýaryndaǵy mýzykalyq materıaldardy meńgerip qana qoımaı, belsendi konserttik is-sharalardy da júrgizedi. Ansámblde oınaý óneri óte kúrdeli. Ol óz oıynyńyzdy baqylaýdy ǵana emes, sonymen qatar áriptesterińizben únemi ózara árekettestikte bolý qajettiligin qamtıdy. Bul degenińiz - mýzykalyq tepe-teńdikti seziný, sizdiń aspabyńyzben birge oınap jatqan aspaptardy tyńdaý, dybystyń kez kelgen ózgeristerine jyldam jaýap berý.
Jańadan bastaǵan pıanıs Sultan Saǵynysh Abaı Qunanbaevtyń «Kózimniń qarasy» ániniń óńdeýin, sonymen qatar zamanaýı hıtterdi oryndap, kórermenderdi óz ónerimen qýantty.
«Pana» áleýmettik beıimdeý ortalyǵynyń turǵyndary – turaqty mekenjaıy joq, aıyrylǵan áleýmettik mártebesin qalpyna keltirgisi keletin adamdar. Ortalyqta turatyndardyń deni egde jastaǵy adamdar, kóbiniń densaýlyǵynda aqaý bar. Konsert tyńdarmandary ár shyǵarmany uzaq jáne jyly qol soǵýmen qoshemettep otyrdy, konsert sońynda rahattanyp alǵan áserleri úshin ónerpazdarǵa sheksiz alǵystaryn bildirip, joǵary kásibı oryndaýdaǵy ásem áýendi qaıta tyńdaýǵa tilek bildirdi.
GATOB QUARTET ujymy – Qazaqstandaǵy akademıalyq baǵyttaǵy tanymal ishekti aspaptar kvarteti. Ol Abaı atyndaǵy QazUOBT-da, qala men respýblıkanyń konserttik alańdarynda jıi tartymdy avtorlyq baǵdarlamalarymen óner kórsetedi. Toptyń basym baǵyttarynyń qatarynda klasıkalyq mýzyka salasyndaǵy aǵartýshylyq jáne tanymaldylyq sharalar, halyqtyń áleýmettik osal toptaryna arnalǵan qaıyrymdylyq konsertter bar.