Qazaqstanda áleýmettik jeliler men messendjerlerde zańsyz kontentti qaıta jarıalaǵan azamattarǵa aıyppul salý kózdelip otyr. Tıisti zań jobasy Májiliste maquldanyp, endi Senat qaraýyna joldandy, - dep habarlaıdy Aqshamnews.kz
Buǵan deıin ınternettegi jaýapkershilik tek azamattyń óz jazbasy nemese zań buzýshylyq elementteri bar jarıalanymy úshin ǵana qarastyrylatyn. Endi usynylǵan túzetýler bul sheńberdi keńeıtip, basqa adamnyń jazbasyn bólisken qoldanýshylardy da jaýapqa tartýǵa múmkindik bermek.
Zań jobasynyń mazmuny
Jańa normalar «Internet-platformalar men ınternet-jarnama týraly» zań aıasynda belgilenedi. Atalǵan qujattaǵy «zańǵa qaıshy kontent» uǵymyna mynalar jatady:
-
konstıtýsıalyq qurylysty buzýǵa shaqyrýlar;
-
ekstremızm men terorızmdi nasıhattaý;
-
zorlyq-zombylyq pen qatygezdikti dáripteý;
-
esirtki zattaryna qatysty nemese ózge de zańmen tyıym salynǵan mazmun.
Eger ýákiletti organdar mundaı materıaldy anyqtasa, olar birden sheshim shyǵarmaıdy. Aldymen kontent mamandandyrylǵan saraptamaǵa jiberiledi. Sarapshy materıaldyń mazmuny zańda kórsetilgen belgilerge saı kele me, sony anyqtaıdy. Alaıda sońǵy sheshimdi tek sot qabyldaıdy, ıaǵnı ákimshilik jaýapkershilik tek sot sheshimimen ǵana týyndaıdy.
Aıta keteıik, mundaı bap ázirge Ákimshilik quqyq buzýshylyq týraly kodekske engizilmegen. Biraq ony tolyqtyrý máselesi 15 qazan kúni Májilistiń plenarlyq otyrysynda talqylandy.
Aıyppul mólsheri
Qazirdiń ózinde Qazaqstanda ınternettegi ádepsiz minez-qulyq pen qorlaıtyn pikirler úshin jazalaý sharalary bar. Bul jeke hattardan bastap, turǵyndar chattaryndaǵy jazbalar men áleýmettik jelilerdegi pikirlerge deıin qamtıdy. Mundaı áreketter úshin 200 aılyq eseptik kórsetkishke deıin aıyppul qarastyrylǵan - bul 2025 jyly shamamen 786 400 teńge.
Alaıda endi bul jaýapkershilik tek jazba avtorlaryna emes, ony taratýshylarǵa - repost jasaýshylarǵa da qoldanylýy múmkin.
Táýekelder men sarapshylar pikiri
Sarapshylar jańa normalardyń qoǵamdaǵy pikir alýandyǵyna áser etý qaýpin joqqa shyǵarmaıdy. Olardyń aıtýynsha, «zańǵa qaıshy kontent» uǵymynyń anyqtamasy tym jalpylama bolǵandyqtan, ony keńinen túsindirý yqtımaldyǵy joǵary.
Mundaı jaǵdaıda shyn máninde qaýipti materıaldarmen qatar, tek daýly nemese qoǵamda talqylaý týdyrǵan pikirler úshin de jaýapkershilik týyndaýy múmkin. Sondyqtan saraptama barysynyń ashyqtyǵy men sot sheshiminiń aıqyndyǵy ádildiktiń basty sharty bolýy tıis, - deıdi mamandar.
Jańa túzetýler qabyldanǵan jaǵdaıda, áleýmettik jeli qoldanýshylary repost nemese qaıta jarıalaý kezinde erekshe saq bolýy kerek. Árbir bólisetin jazbanyń mazmuny zańǵa qaıshy kelmeıtinine kóz jetkizý - ınternettegi jeke jaýapkershiliktiń jańa talaby bolmaq.