Qazaqstan Respýblıkasynyń memlekettik qyzmeti – memlekettik qyzmetshilerdiń memlekettik organdarda memlekettik bıliktiń mindetteri men fýnksıalaryn iske asyrýǵa baǵyttalǵan laýazymdyq ókilettikterdi atqarý jónindegi qyzmeti ekeni belgili.
Qazaqstan Respýblıkasynyń memlekettik qyzmetshisi – memleket pen qoǵam arasyndaǵy baılanystyrýshy negizgi tulǵa. Olar eldiń damýyna, halyqtyń ál-aýqatyn arttyrýǵa jáne memlekettik saıasatty júzege asyrýǵa jaýapty azamattar bolyp tabylady.
Memlekettik qyzmet – bul tek jumys orny ǵana emes, úlken jaýapkershilik pen halyqqa adal qyzmet etýdiń úlgisi. Memlekettik qyzmetshi óz isinde kásibılikti, ádildikti, ashyqtyqty jáne adaldyqty basty qaǵıda retinde ustanýy qajet.
Qazaqstan Respýblıkasynyń «Memlekettik qyzmet týraly» Zańynda memlekettik qyzmettiń kelesi negizgi prınsıpteri naqty aıqyndalǵan.
1) zańdylyq;
2) qazaqstandyq patrıotızm;
3) memlekettik qyzmet júıesiniń birtutastyǵy;
4) azamattar quqyqtarynyń, bostandyqtarynyń jáne zańdy múddeleriniń memleket múddeleri aldyndaǵy basymdyǵy;
5) memlekettik organdar qyzmetindegi tıimdilik, nátıjelilik, ashyqtyq;
6) azamattardyń memlekettik qyzmetke qol jetkizýge teń quqyǵy;
7) azamattardyń memlekettik qyzmetke kirýiniń eriktiligi;
8) memlekettik qyzmetshilerdiń kásibıligi;
9) merıtokratıa – memlekettik qyzmetshiniń eńbegi men qabiletine qaraı ósýi;
10) joǵary turǵan memlekettik organdar men laýazymdy adamdar óz ókilettikteri sheginde qabyldaǵan sheshimderdi oryndaýdyń memlekettik qyzmetshileri úshin mindettiligi;
11) memlekettik qyzmetshilerdiń baqylaýda bolýy jáne eseptiligi;
12) memlekettik qyzmetshilerdiń laýazymdyq mindetterin oryndamaǵany úshin jeke jaýaptylyǵy;
13) ádeptilik;
14) quqyq buzýshylyqtarǵa tózbeýshilik;
15) memlekettik qupıalardy nemese zańmen qorǵalatyn ózge de qupıany quraıtyn qyzmetti qospaǵanda, qoǵamdyq pikir men jarıalylyqty eskerý;
16) memlekettik qyzmetshilerdiń quqyqtyq jáne áleýmettik qorǵalýy;
17) máni birdeı jumystardy oryndaǵany úshin eńbekaqyny teń tóleý;
18) memlekettik qyzmetshilerdi minsiz memlekettik qyzmeti úshin kótermeleý;
19) memlekettik qyzmetshilerdi oqytýdyń jáne qajetti quzyretterin damytýdyń úzilissiz bolýy;
20) memlekettik qyzmetshilerdi biliktiligin arttyrýdyń praktıkalyq baǵdarlanýy qaǵıdattaryna negizdeledi.
Búgingi tańda elimizde memlekettik basqarý júıesin jańǵyrtý, sıfrlandyrý, halyqpen tıimdi baılanys ornatý baǵytynda kóptegen reformalar júzege asýda. Bul ózgeristerdiń basty maqsaty – halyqtyń senimine ıe, ashyq ári tıimdi memlekettik apparat qalyptastyrý.
Memlekettik qyzmetshiniń basty mindeti – el ıgiligi úshin eńbek etý, halyqtyń múddesin qorǵaý jáne qoǵamda ádildik ornatý. Árbir qyzmetshi óz isiniń nátıjesi arqyly memleket bedelin kóterýge úles qosady.
Sondyqtan da memlekettik qyzmetshi bolý – zor mártebe ári úlken jaýapkershilik. El taǵdyryna beıjaı qaramaıtyn, Otanyna adal, kásibı jáne izgilikti azamattar ǵana bul joldy tańdaı alady.