Jalǵan aqparat taratqan blogerler endi 103 myń 500 teńgeden 345 myń teńgege deıin aıyppul tóleıdi.
Onyń mólsheri aılyq eseptik kórsetkishke qaraı ózgerip otyrady. Ǵalamtordaǵy áreketin bir jylda qaıtalasa, eki ese aıyppul arqalaıdy. Yryqqa kónbese, 15 táýlikke deıin qamaýǵa alynady, dep habarlaıdy Almaty-akshamy.kz.
Prezıdent «Onlaın-platformalar jáne onlaın-jarnama týraly» zańǵa qol qoıdy. Zańnyń maqsaty – eń aldymen adam quqyǵyn qorǵaý. Resmı derekterge súıensek, ótken jyly ınternette jalǵan aqparat taratýǵa qatysty 5 jarym myńnan astam is tirkelgen. Endi ǵalamtorda erkinsingenderdi eshkim mańdaıynan syıpaımaıdy. Tıisti zańdy Parlament maquldady. Prezıdent qol qoıdy.
«Parlament músheleri, Májilis músheleri osy onlaın-platforma jónindegi zańdy jasaǵan kezde eń birinshi Eýropa elderiniń, sonymen birge AQSH-tyń áleýmettik jelini retteý jónindegi praktıkasyna súıendi. Áleýmettik jeliniń ishinde jarnama bolady, kóptegen azamattar ózderiniń kýrstaryn ótkizedi. Sondaı bir qatynasqa túsetin bolsa onda salyq tóleý kerek», - dedi QR Parlamenti Májilisiniń depýtaty, «AMANAT» fraksıasynyń múshesi Erlan Saırov.
Bul - memlekettik retteý. Paıdalanýshylar óz paraqshalarynda jarıalaıtyn jarnamany tańbalaýǵa mindetti. Jalǵan aqparat taratqan blogerler jazadan qutylmaıdy. Bul rette olar tabysyna qaraı úsh topqa bólinedi. Shaǵyn kásipkerlik bolsa 30 AEK mólsherinde aıyppul salynady. Orta kásipkerlik – 50, iri bızneske jatsa – 100 AEK mólsherinde aıyppul arqalaıdy. Bir jyl ishinde árketi qaıtalansa shaǵyn kásipkerliktiń ókili 50 AEK mólsherinde aıyppul tóleıdi. Qalǵandariniki eki eselenedi. Quqyq buzýshylyqqa tosqaýyl bolmasa bloger nemese ınflúenser 15 táýlikke deıin qamaýǵa alynady. Blogerlerden bólek, qarapaıym qoldanýshy qoǵamdyq tártipti, azamattardyń zańmen qorǵalatyn múddelerin buzýǵa alyp keletin jalǵan aqparat jarıalasa, oǵan 20 AEK mólsherinde aıyppul salynady. Áreketi qaıtalansa aıyppul eki ese artady.
«Bul zań belgili bir áleýmettik jelilerdi buǵattaýǵa, keıbir adamdardy qýdalaý maqsatynda qabyldanǵan zań emes. Kez kelgen azamat óziniń artynda kúshti memleket turǵanyn seziný kerek. Kez kelgen azamat jalǵan aqparat taratý arqyly, sonyń saldarynan ekinshi bir qıynshylyqtar týmaýyna jaýapkershiligi bolý kerek», - deıdi QR Aqparat jáne qoǵamdyq damý mınıstrliginiń departament dırektory Qaınar Ahetov.
Áleýmettik jeline retteıtin qujattar Germanıa, Ispanıa, Fransıa sekildi órkenıetti elderde burynnan bar. Eýroodaqtaǵy zańnamalardyń negizgi qaǵıdaty - kúndelikti ómirdegi talaptar onlaın-ómirde de saqtalýy tıis. Bizde qabyldanǵan qujat ta osyny ustanady.
Mahat Sadyq, jýrnalıs:
Keıingi kezde baıqap otyrmyz, árkim oıyna kelgenin jatyp jaza beredi. Bul qoǵamnyń alǵa damýyna kedergisin keltiredi. Sóz qudireti arqyly eldi kórketýge bolady. Aǵylshyn men Fransıa qandaı memleket! Mynaý qazirgi onlaın-platforma úlken ózgeristerdi bastaıdy dep otyrmyn da. Árkim óz sózine jaýap berip, óz sózimen jumys isteý kerek.
Endi «Google», «Facebook», « Tik-Tok» sekildi iri áleýmettik jelilerinde qazaq tiliniń qoldaný aıasyn keńeıtýge de basymdyq beriledi. Mamandar elde iri onlaın-platformalardyń ókilderikterin ashýda problema bolmaıdy dep otyr. Onyń ústine «feık-akkaýnttarmen» de kúres kúısheıtiledi.