Sýbsıdıalaýdyń biryńǵaı memlekettik aqparattyq júıesin ázirleý aıaqtalýǵa jaqyn
Erbol Qarashókeev jumys saparymen Almaty oblysyna keldi, dep habarlaıdy Almaty-akshamy.kz.
Vedomstvo basshysy oblys ákimi Qanat Bozymbaevtyń tóraǵalyǵymen ótken AÓK damytý máseleleri jónindegi keńeske qatysty.
Jıynǵa QR Parlamenti Senatynyń depýtaty A.Kúrishbaev, Ekologıa, geologıa jáne tabıǵı resýrstar vıse-mınıstri S. Qojanıazov, kásipkerler, fermerler jáne azamattyq qoǵam ókilderi qatysty. Qatysýshylar AÓK memlekettik qoldaý, egis naýqanyn júrgizý jáne memlekettik baǵdarlamalardy iske asyrý máselelerin talqylady.
Erbol Qarashókeev Úkimet pen mınıstrlik agroónerkásiptik keshendi damytý boıynsha birqatar júıeli jáne jedel daǵdarysqa qarsy sharalar qabyldap jatqanyn atap ótti.
Memleket basshysynyń tapsyrmasyna sáıkes, AÓK sýbsıdıalaý tetigin jetildirý boıynsha jumys júrgizilip jatyr.
Birneshe nusqa usynyldy, alaıda Prezıdentpen kelise otyryp, sondaı-aq álemdegi azyq-túlik naryǵyndaǵy kúrdeli jaǵdaıdy eskere kele, Úkimet sýbsıdıalaý júıesin reformalaýdy 2023 jylǵy 1 qańtarǵa deıin keıinge qaldyrýdy jáne bıyl fermerlerdi qoldanystaǵy sqema sheńberinde sýbsıdıalaý týraly sheshim qabyldady.
«Jalpy, agroónerkásiptik keshendi qoldaýǵa bıyl 309 mlrd teńge sýbsıdıa qarastyrylǵan, onyń ishinde ósimdik sharýashylyǵyna – 79,7 mlrd teńge, mal sharýashylyǵyna – 100 mlrd teńge, aýyl sharýashylyǵy ónimderin óńdeýge – 8,4 mlrd teńge, qarjy quraldaryna – 120,4 mlrd teńge kózdelip otyr», - dedi mınıstr.
Budan bólek, Memleket basshysynyń tapsyrmasy boıynsha salany damytýǵa qosymsha qarjylandyrý bólý máselesi pysyqtalýda, olar ótken jyly paıda bolǵan bereshekti óteýge baǵyttalatyn bolady.
Sondaı-aq aýyl sharýashylyǵy ónimin óndirý kezinde paıdalanylatyn taýarlyq-materıaldyq resýrstarǵa baǵanyń artýynyń saldaryn joıady.
Sýbsıdıalaýdyń biryńǵaı memlekettik aqparattyq júıesin ázirleý aıaqtalýǵa jaqyn.
Onyń negizgi fýnksıonaly avtomatty rejımde sýbsıdıa alýshylardyń tizilimin qalyptastyrý, olardyń EQJJ boıynsha aýyl sharýashylyǵy taýaryn óndirýshiler sanatyna sáıkestigin tekserý, sýbsıdıa alýshylardyń qarsy mindettemelerin tirkeý jáne olardyń oryndalý dárejesin, sýbsıdıa alý kezektiligin jáne qanaǵattandyrylmaǵan ótinimderdi kútý paraǵyn baǵalaý bolady.
Bul júıe tegin jáne barlyq negizgi memlekettik derekter bazalarymen ıntegrasıalanady. Ony ekinshi jartyjyldyqtan bastap engizý josparlanyp otyr.
«Búgingi tańda basym mindetterdiń biri - egis naýqanyn ýaqtyly jáne sapaly ótkizý. Ol úshin mınıstrlikte jedel shtab qurylyp, jumys istep jatyr. Ol kóktemgi dala jumystarynyń barlyq túıtkildi máselelerin der kezinde sheshýge baǵyttalǵan», - dep atap ótti vedomstvo basshysy.
Memleket basshysynyń tapsyrmasy boıynsha mınıstrlik óńirlermen birlesip aýyl sharýashylyǵy tehnıkasynyń, tuqym jáne tyńaıtqysh qorlarynyń daıyndyǵyn qaıta tekserýdi aıaqtaýǵa jaqyn.
Tehnıkanyń daıyndyǵy 96 % quraıdy, óńirlerge arzandatylǵan dızel otynyn jóneltý bastaldy. Jalpy kóktemgi dala jumystaryn júrgizýge 400,2 myń tonna bólindi.
Sondaı-aq otandyq aýyl sharýashylyǵy taýaryn óndirýshiler tuqymdyq materıalmen tolyq qamtamasyz etilgen. 2,3 mln tonna tuqym sebildi nemese bul - jospardyń 100%.
Mıneraldy tyńaıtqyshtarmen qamtamasyz etý boıynsha jumystar josparly rejımde júrgizilýde, amıak selıtrasynyń baǵasy 200 myń teńgeden 160 myń teńgege deıin tómendedi.
«Keń dala» baǵdarlamasy arqyly fermerler 70 mlrd teńge kóleminde jeńildetilgen nesıe jáne 80 mlrd teńge kóleminde azyq-túlik korporasıasyn forvardtyq satyp alýmen qamtamasyz etildi. Bul rette forvardtyq satyp alý bıyl 2 esege artqanyn aıta ketken jón.
25 naýryzdaǵy jaǵdaı boıynsha «Keń dala» baǵdarlamasy boıynsha 80,2 mlrd teńge somaǵa ótinim kelip tústi, onyń 49 mlrd teńgesi qarjylandyryldy.
«Azyq-túlik korporasıasy» AQ 80 mlrd teńgeden astam somaǵa ótinimder kelip tústi, onyń 54 mlrd teńgesi qarjylandyryldy.
«Ózderińizge belgili, sońǵy ýaqytta aýyl sharýashylyǵy óndirisi úshin taýarlyq-materıaldyq zattar birneshe ese qymbattady. Bul baǵamdyq aıyrmashylyqqa, sondaı-aq Reseı Federasıasynyń aýmaǵynda óndirilip, Qazaqstanǵa ótkiziletin tuqymdardyń, agrohımıanyń, qosalqy bólshekter men jabdyqtardyń jetkizý arnalarynyń buzylýyna baılanysty bolyp otyr», - dedi Erbol Qarashókeev.
Mınıstrlik kóktemgi egis jáne egin jınaý jumystaryn júrgizý úshin qarjylandyrýdy qosymsha 70 mlrd teńgege ulǵaıtyp, búdjettik kredıtteýdiń jalpy somasyn 140 mlrd teńgege deıin jetkizý qajettigin atap ótti.
Forvardtyq satyp alýǵa 20 mlrd teńge bólý máselesi pysyqtalyp jatyr.
Bul mal basy men qustyń saqtalýyn qamtamasyz ete alatyn 200 myń tonna kóleminde astyq qoryn qalyptastyrýǵa múmkindik beredi.
Mınıstr salanyń eksporttyq áleýetin damytý, aýyl sharýashylyǵy tehnıkasyn satyp alý, sýarýdyń zamanaýı júıelerin satyp alý jáne qajetti ınfraqurylymdy júrgizý qajettigine nazar aýdardy.
Kókónister men qant qyzylshasyn óndirý jáne qaıta óńdeý boıynsha ınvestısıalyq jobalardy iske asyrýǵa qosymsha 8,3 mlrd.teńge bólinetin bolady.
Bul qarajat qazirgi zamanǵy sýarý júıelerin satyp alýdy jáne qajetti ınfraqurylym júrgizýdi qarjylandyrýǵa baǵyttalady.
«Aýyl turǵyndarynyń tabysyn arttyrý boıynsha jobany keńeıtý aıasynda aýyldyq eldi mekender men shaǵyn qalalardyń turǵyndaryn shaǵyn nesıeleýge 40,0 mlrd teńge bólý máselesi qarastyrylyp jatyr. Baǵdarlamada 5-7 jyl merzimge 6% - pen mıkrokredıt berýdi kózdeıdi. Bul 10 myń jumys ornyn ashýǵa múmkindik beredi», - dedi ASHM basshysy.
Keńeske qatysýshylar Almaty oblysynyń aýyl sharýashylyǵyn damytýdyń ózekti máselelerin kóterdi, spıkerlerge janar-jaǵar maı, tyńaıtqyshtar jáne kóktemgi egis jumystaryna daıyndyq, sondaı-aq bordaqylaý alańdaryn damytý boıynsha birqatar suraqtar qoıdy.
Vedomstvo basshysy oblys fermerleriniń AÓK damytýǵa jáne eldiń azyq-túlik qaýipsizdigin qamtamasyz etýge qosqan eleýli úlesin atap ótip, barlyq problemalyq máselelerden habardar ekenin jáne olar Úkimettiń nazarynan qalmaıtynyna sendirdi.
QR Aýyl sharýashylyǵy mınıstrligi aýyl sharýashylyǵyn damytýdyń turaqtylyǵyn arttyrýǵa múmkindik beretin barlyq qajetti sharalardy qabyldaıtyn bolady.