Matematıkadan IMO-2022 halyqaralyq olımpıadasynda Qazaqstan oqýshylarynyń bári júldeger atandy.
Bul jaıynda Oqý-aǵartý mınıstri Asqat Aımaǵambetov Facebook paraqshasynda jazdy, dep habarlaıdy Almaty-akshamy.kz QazAqparatqa silteme jasap.
«Oqýshylarymyz matematıkadan IMO-2022 halyqaralyq olımpıadasynda úzdik nátıje kórsetti. Ulttyq quramamyz 174 upaı jınady. Bul - elimizdiń osy olımpıadaǵa qatysý tarıhyndaǵy rekordtyq kórsetkishi. IMO - álemdegi eń bedeldi pándik olımpıadalardyń biri. Prezıdenttiń tapsyrmasy boıynsha dál osyndaı olımpıadalarda júlde alǵan oqýshylar men olardyń pedagog-tálimgerlerine tólemder belgilep, oqýshylarǵa UBT-ny tapsyrmaı-aq elimizdiń JOO-laryna túsýge bolatyndaı jaǵdaı jasaǵanymyzdy atap ótkim keledi», - dedi mınıstr.
Onyń atap ótýinshe, olımpıadaǵa qatysqan 6 oqýshynyń barlyǵy da júldeli oryndarǵa ıe boldy. Olar 3 kúmis, 3 qola medal jeńip aldy. Kúmis medal ıegerleri: Taır Satýbaldın, Fetýllah Sam, Mıron Iýrkevıch; qola medal alǵandar: Ádilet Zaýythan, Ádilet Ábý, Iýrıı Ten.
«Zıatkerlik saıysqa 104 elden barlyǵy 589 oqýshy qatysty. Onyń ishinde Qytaı, AQSH, Ońtústik Koreıa, Japonıa, Ulybrıtanıa, Italıa, Kanada jáne taǵy basqa elder bar. Sonymen qatar oqýshylarymyz álemdik esepte 17-orynǵa turaqtady. Júldegerlerdi jeńisimen quttyqtaımyn!» - dep atap ótedi Asqat Aımaǵambetov.