Gýmılev atyndaǵy Eýrazıa ulttyq ýnıversıtetiniń profesory, fızıka-matematıka ǵylymdarynyń doktory Ratbaı Myrzaqulov «Álemdegi eń bedeldi ǵalymdardyń» reıtıńine endi.
Bul kórsetkishti jyl saıyn Amerıka Qurama Shtattarynyń Stenford ýnıversıteti sarapshylary jasap shyǵarady. Onda áleýmettik jelide eń kóp qaralyp, silteme jasalǵan eńbekter saralanady. Qazaqstandyq ǵalymnyń «Myrzaqulov teńdeýi» men «Myrzaqulov gravıtasıasy» dep atalatyn eńbekteri sheteldik mamandardy qyzyqtyryp otyr, dep habarlaıdy Almaty-akshamy.kz 24.kz-ke silteme jasap.
Stenford ýnıversıtetiniń sarapshylary bul reıtıńti Elsevier (Elsevır) ǵylymı baspasynyń sońǵy málimetterine súıene qurastyrady. Onda álemdegi eń úzdik ǵalymdardyń eńbekteri eki sanat boıynsha baǵalanady. Birinshisine búkil eńbek jolynda jumystaryna eń kóp silteme jasalǵan ǵalymdar usynylsa, ekinshisine sońǵy jyldary jasaǵan eńbegine kóp silteme jasalǵan oıshyldar baǵamdalady . Osylaısha, akademık Ratbaı Myrzaqulov astrofızıka- gravıtasıa- kosmologıa boıynsha zertteýleri úshin birden qos tizimge endi.
«Ǵylym degen - úlken báseke. Búkil dúnıe júziniń memleketteriniń, Eýropa, Amerıka, Azıanyń úlken memleketteriniń ǵalymdarymen konkýrensıaǵa túsip, solardyń aldyna shyǵyp, eki paıyzyna kirý - biz úshin úlken mártebe. Ol - biz úshin berilgen obektıvtik baǵa », - deıdi fızıka-matematıka ǵylymdarynyń doktory, profesor Ratbaı Myrzaqulov.
1998-99 jyldary amerıkalyq ǵalymdar planetanyń údemeli túrde keńeıip bara jatqandyǵyn dáleldeıtin maqalalardy jaryqqa shyǵara bastaıdy. Ol pikir qaıshylyǵyn týyndatyp, eskperıment túrinde dáleldense de, teorıada eshkim dáleldeı almaıdy. Búkil álem oıshyldary nazarǵa alǵan ilimdi, qazaqstandyq ǵalym Ratbaı Myrzaqulovta zertteıdi. Nátıjesinde, ol Eınshteınniń keńitilgen teorıasyn jasap shyǵarady. Fızık óz eńbegin «Myrzaqulov gravıtasıasy» dep ataıdy. Dál osy eńbek shetelde tanymaldylyqqa ıe bolyp, basylymdarynda 10-nan asa maqala jazylǵan.
«Myrzaqulovtyń teorıasy barlyq mindetterdi óte qyzyqty túrde sıpattaıdy. Ol naqty dáleldenip jazylǵan. Ony ár túrli eldiń ǵalymdary belsendi túrde zertteýde, sondyqtan ol álemdegi eń bedeldi ǵalymdardyń, eń kóp silteme jasalǵan ǵalymdarynyń tizimine endi», - deıdi EUÝ«Jalpy jáne teorıalyq fızıka» kafedrasynyń meńgerýshisi Qoblandy Erjanov.
Búginde Ratbaı Myrzaqulov - 400-den astam ǵylymı jumystyń avtory. Onyń 300-den astam maqalasy sheteldik baspalarda jarıalandy.