Bir elde sý tasysa, basqa jerde daýyl soǵyp, dúıim jurttyń degbirin qashyryp jatyr
Álemde tabıǵı apat jıilep barady, dep habarlaıdy Almaty-akshamy.kz.
«Habar24» málimeti boıynsha Vetnamdaǵy aptaptyń beti qaıtar emes. Kún maı erıtindeı kúıip tur. Shyjyǵany sonsha, jan shydatpaıdy. Synap baǵanasy 44 gradýstan asady. Jurt ystyqtan qorǵanýdyń amalymen álek. Kóbi jeldetkish qosyp úıden shyqpaýdy jón sanaǵan. Biraq bul energıa júıesine úlken salmaq bolyp tur. Sondyqtan elektr qýaty óshirilip jatyr. Óıtkeni mundaı júktemege eldegi energetıka keshenderi shydas bermeýi múmkin.
Kúnniń ysýy qazir metro jumysyna da keri áserin tıgizip jatyr. Osyǵan baılanysty Tashkentte poıyz qozǵalysynyń jyldamdyǵy tómendetilmek. Qaýipsizdik erejelerine sáıkes, relsterdiń temperatýrasy 55 gradýstan asqanda jyldamdyq ýaqytsha shekteledi. Búginde jerastyndaǵy shoıyn joldyń keı bólikterinde temperatýra 77 gradýsqa jetedi eken.
Irak astanasy qumdy daýyldyń astynda qaldy. Baǵdat birneshe saǵatqa qara túnekke batyp, kóshelerin qum basty. Turǵyndar syrtqa shyǵa almaı, úılerinde qamalýǵa májbúr. Betperdesiz shyǵý múmkin emes. Aıta óteıin, qumdy daýyl Irak turǵyndary úshin úırenshikti qubylys. Biraq keıingi ýaqytta ol jıilep ketken. Osyǵan qatysty mamandar qatty alańdaýshylyq bildirip otyr. Óıtkeni elde jaýyn-shashyn azaıyp ketken.
Al Japonıanyń Aıtı prefektýrasynda tolassyz jańbyr jaýyp, joldardy sý shaıyp ketti. Nóser demalys kúnderi toqtamaı jaýǵan. Sonyń kesirinen óńirde kólik qozǵalysy irkildi. Poıyz qatynasy ýaqytsha toqtady. 7 úı jaryqsyz otyr. Qazir apat aımaǵynda qalpyna keltirý jumystary júrip jatyr. Esterińizde bolsa, birneshe kún buryn ǵana Japonıada Mavar taıfýny soqqan edi. Sóıtip 7 prefektýrada qaýiptiń 4 deńgeıi jarıalandy. 300 myń adam qaýipsiz jerge kóshirildi. Bir adam qaıtys bolyp, ekeýi iz-túzsiz joǵalyp ketti.