Alergıa men demikpe –dúnıe júzinde eń keń taralǵan aýrýlar.
Bronh demikpesi tynys alý joldarynyń aýrýlaryna ákeledi. Alaıda demikpeniń sebebi alergıa da bolýy múmkin. Bul týraly alergolog, ımmýnolog Araı Batyrbaeva aıtty, dep habarlaıdy Almaty-akshamy.kz QazAqparatqa silteme jasap.
30 mamyrda dúnıe júzinde Alergıa jáne demikpemen kúresý kúni atalyp ótedi. Negizgi maqsaty – dárigerlerdiń, naýqastardyń jáne halyqtyń osy aýrýlar týraly aqparattandyrylýyn arttyrý, alergıa men demikpege baılanysty máselelerdi sheshýge qoǵamnyń nazaryn aýdarý jáne pasıentterge kórsetiletin medısınalyq kómektiń sapasyn arttyrý.
Kardıologıa jáne ishki aýrýlar ǴZI Respýblıkalyq alergologıalyq ortalyǵy basshysynyń mindetin atqarýshy alergolog, ımmýnolog Araı Batyrbaevanyń aıtýynsha, dúnıe júzinde eresek turǵyndardyń 5%-dan astamy jáne balalardyń 10%-y demikpe aýrýyna shaldyqqan. Bronh demikpesi – túrli ishki jáne syrtqy qorshaǵan orta faktorlarynan bronhylardyń tarylýyna yqpal etetin tynys alý joldarynyń aýyr sozylmaly qabyný aýrýy.
"Ýaqytyly aldyn alsa jáne durys josparlanǵan jaǵdaıda, demikpeni boldyrmaýǵa bolady. Demikpeniń aldyn alýdyń negizgi baǵyty – alergıa men tynys alý joldarynyń sozylmaly aýrýlaryn boldyrmaý. Temeki tútini nemese titirkendirgish hımıalyq zattarmen baılanysta bolatyn balalar alergıaǵa jıi shaldyǵady jáne bronh demikpesimen aýyrady. Eń keń taralǵan alergender: úıdegi shań, taraqandar, kishkentaı keneler, úı janýarlarynyń júni, zeń, tamaqtyń keı túrleri, ósimdik tozańy", – deıdi dáriger.
Araı Batyrbaevanyń aıtýynsha, bronh demikpesiniń aldyn alý boıynsha durys josparlanǵan jáne júzege asyrylyp jatqan sharalar – aýrýdyń aldyn alý jáne emdeýdiń tıimdi tásili.
«Zamanaýı medısına tájirıbesi demikpeniń aldyn alý is-sharasyn durys oryndaý kóbine aýrýdy emdeýge nemese pasıenttiń demikpege qarsy dári-dármekterdi paıdalanýyn azaıtýǵa jetkilikti ekenin kórsetti. Dıagnostıkalaý men emdeýdiń zamanaýı ádisteriniń arqasynda aýrýdy baqylaýǵa bolady», - dedi ol.
Spıkerdiń sózinshe, durys emdeý júrgizilse, demikpemen aýyratyndardyń kóbi ony baqylap otyrýǵa, sımptomdarynan arylýǵa, ustamalardyń sırek bolýyna nemese tipti múldem bolmaýyna, arnaıy dári-dármekterdi sırek paıdalanýǵa qol jetkize alady.