Quttyqtaý jedelhattary áli de tolastar emes.
Prezıdent Qasym-Jomart Toqaevtyń atyna Respýblıka kúnine oraı shet memleketter men halyqaralyq uıymdar basshylarynan quttyqtaý jedelhattary kelip jatyr, dep habarlaıdy Almaty-akshamy.kz Aqordaǵa silteme jasap.
Túrkıa Prezıdenti Rejep Taııp Erdoǵan Qasym-Jomart Toqaev pen baýyrlas Qazaqstan halqyn Ulttyq merekemen quttyqtap, elimizge baq-bereke tiledi.
«Til, tarıh jáne mádenıet sıaqty ortaq qundylyqtarymyzǵa negizdelgen qarym-qatynasymyz strategıalyq seriktestik rýhynda qarqyndy damyp keledi. Eki eldiń yntymaqtastyǵy jańa salalarmen tolyǵa túskeni qýantady. Bizdiń birlesken kúsh-jigerimizdiń nátıjesinde Túrkıa men Qazaqstan arasyndaǵy baılanystar odan ári nyǵaıa beretinine senimdimin. Sizben Astana qalasynda ótetin Túrki memleketteri uıymynyń H samıtinde kezdesetinime qýanyshtymyn», – delingen jedelhatta.
Slovakıa Prezıdenti Zýzana Chapýtova Memleket basshysyna turaqty, ádiletti jáne baqýatty Qazaqstandy damytýǵa baǵyttalǵan reformalardy iske asyrýda tabys tiledi. Sondaı-aq ol halyqaralyq quqyq qaǵıdattaryn qurmetteýge negizdelgen ózara yntymaqtastyqtyń nátıjesinde elderimiz qazirgi zamannyń syn-qaterlerin birge eńseretinine senim bildirdi.
Serbıa Prezıdenti Aleksandr Výchıch óziniń jedelhatynda eki el arasyndaǵy ózara qurmet pen túsinistikke quralǵan dástúrli dostyq qatynastardyń nyǵaıyp kele jatqanyn atap ótti. Aleksandr Výchıch Serbıa jáne Qazaqstannyń múddesi men ıgiligi jolyndaǵy ózara yqpaldastyq aldaǵy ýaqytta da keńeıedi dep senetinin jazǵan.
Sonymen qatar óz quttyqtaýlaryn Lıtva Prezıdenti Gıtanas Naýseda, TMD Parlamentaralyq Assambleıasy Keńesiniń Bas hatshysy Dmıtrıı Kobıskıı, AÓSSHK Bas hatshysy Qaırat Sarybaı, UQSHU Bas hatshysy Imanǵalı Tasmaǵambetov jáne basqalar joldady.