Alıment máselesi álem elderinde de ózekti.
Boryshkerlerge qatysty qoldanylatyn jazanyń da san túri bar. Máselen, Eýropada alıment tóleýden jaltarǵandardy 3 jylǵa deıin bas bostandyǵynan aıyrý qarastyrylǵan. Condaı-aq, birqatar memlekette alıment tóleýden jaltarǵandarǵa qatysty zań qatań, dep habarlaıdy aqshamnews.kz 24.kz-ke silteme jasap.
Fransıada alımentten jaltarǵan ata-analarǵa 2 jylǵa deıin bas bostandyǵynan aıyrý jazasy bar. Sonymen qatar, olar 15 myń eýro kóleminde aıyppul tóleıdi. Zańǵa sáıkes, alıment tóleýshi adam turǵylyqty mekenjaıy nemese qarjylyq jaǵdaıy ózgerse, der kezinde tıisti organdarǵa habarlaýǵa mindetti. Umytqan jaǵdaıda 6 aıǵa deıin temir torǵa qamalyp, 7,5 myń eýro aıyppul tóleýi tıis. Qazirde Fransıada alımentke arnalǵan biryńǵaı platforma bar. Sonyń kómegimen arnaıy agenttik bereshekterdi jınap, alıment alýshylarǵa joldaıdy. Eger kimde-kim tólem jasamaǵan bolsa, memlekettik organ birden shara qabyldaıdy. Dese de, zańnyń qatań bolǵanyna qaramastan, Fransıada alımenttiń 30-40 paıyzy ýaqytyly tólenbeıdi.
Belgıa
Al Belgıada jaýapsyz ata-analarǵa jaza jeńil. Tek júrgizýshi kýáliginen aıyrylýmen shekteledi. Tipti, 50 de 50 júıesi arqyly alıment tóleýden túbegeıli qutylýǵa da bolady. Ol úshin bala apta saıyn kezek-kezek ákesimen de, anasymen de birdeı ýaqyt ótkizýi qajet.
Ońtústik Koreıa
Al Ońtústik Koreıada balasynan bezip, bir jyl boıy alıment tólemegenderge 8 myń dollar aıyppul salynady. Shekara asýyna tyıym salynyp, bir jylǵa deıin túrmege qamalady. Ońtústik Koreıanyń Genderlik teńdik jáne otbasy mınıstrligi óz saıtynda jyl saıyn alıment tóleýden jaltaryp júrgenderdiń jeke málimetin jarıalap otyrady. Ata-analar óz balalarynyń aldyndaǵy qaryzyn ótemeıinshe, bul derek óshirilmeıdi. Tek boryshkerler qaıtys bolǵanda nemese qaryzyn ótegen jaǵdaıda ǵana joıylady. Óıtkeni, Ońtústik Koreıada jumysbasty analar kóp. Saǵattyń kóptigi men qaýyrt jumystan otanasy otbasy jaıyna bas qatyrmaıdy. Ári ózin-ózi asyraı alatyndaı jalaqysy da mardymdy. Bala týý kórsetkishiniń de keıingi jyldary kúrt tómendep ketkeni sodan.
Túrkıada erli-zaıyptylar ajyrassa, sot kóp jaǵdaıda balany ákesimen qaldyrady. Óıtkeni, otbasyn asyraý mindeti ákege júkteledi. Túrkıa azamaty balasynyń bar qajetin óteýge mindetteledi. Balaǵa tóleıtin alıment mólsheri – aıyna 100 ben 1000 dollar aralyǵynda. Sondaı-aq, tek balaǵa ǵana emes, anaǵa da alıment tólenedi. Máselen, ajyrasqan erkek áıeli ekinshi ret turmysqa shyqqansha alıment tóleýge mindetti. Al, tólemegenderi 3 jylǵa deıin bas bostandyǵynan aıyrylady. Abaqtydan merziminen buryn bosaý úshin alımentti tolyq tóleýi qajet. Bar jaýapkershilik óz moıynynda bolǵandyqtan er adamdar birinshi otbasynyń, balasy men áıeliniń jaǵdaıyn jasaýdy oılaıdy. Sondyqtan bolar, Túrkıada ajyrasý az kezdesedi.