Álemniń 21 elinde koronavırýs ınfeksıasynyń beti qaıtyp keledi. Sonyń ishinde Qazaqstanda syrqattaný jaǵdaıynyń tómendeýi – 17 paıyz, dep habarlaıdy almaty-akshamy.kz QazAqparatqa silteme jasap.
QR Densaýlyq saqtaý mınıstri Alekseı Soı Úkimet otyrysynda osyndaı derek keltirdi.
«Búkil álemde koronavırýs ınfeksıasynyń 240 mıllıonnan astam, táýligine 300 myńǵa jýyq jaǵdaı tirkelip otyr, 4,9 mıllıonnan astam adam qaıtys boldy. Dúnıejúzilik densaýlyq saqtaý uıymynyń Eýropa aımaǵyndaǵy málimetteri boıynsha, sońǵy eki aptada 54 eldiń 33-inde aýrýdyń ósýi baıqalǵan. Sońǵy 14 kúnde aýrýdyń eń kóp ósýi Polshada baıqaldy. Onda syrqattaný deńgeıi 122%-dan asqan. Grýzıada – 98%, Ýkraınada – 69%, Vengrıada – 50-dan astam, Armenıada - 40%-dan astam, Reseıde-30%, Moldovada – 20%-dan astam, Túrkıa, Aýstrıa jáne Germanıa, Qyrǵyzstan, Belarýs elderinde 2-den 10%- ǵa deıin ósken», - dedi Alekseı Soı. Onyń aıtýynsha, syrqattaný deńgeıiniń túsýi 21 elde baıqalyp otyr. «Syrqattaný kórsetkishi Izraılde 61%, Ispanıada 43%, Shveısarıada 39%, Chernogorıada 24%, Italıada 22%, Fransıada 16%, Ázirbaıjanda 7% túsken. Qazaqstanda keıingi eki aptada syrqattaný 17% - ǵa tómendedi», - dedi Densaýlyq saqtaý mınıstri.