Jekeleı synda Qazaqstannan Iýlıa Pýtınseva ǵana qaldy
Qazaqstannyń birinshi, álemniń 47-raketkasy Aleksandr Býblık AQSH ashyq chempıonatynyń úshinshi aınalymyna shyǵa almady, dep habarlaıdy Almaty-akshamy.kz QazAqparatqa silteme jasap.
Qazaqstandyq tenısshi ekinshi aınalymda álemniń 15-raketkasy, Monreal masters týrnıriniń chempıony, ıspanıalyq Pablo Karreno-Býstamen sheberlik baıqasty.
Aleksandr Býblık básekeni jaqsy bastady - 6:4. Alaıda birinshi partıadan keıin ıspanıalyq sportshy kúsh alyp ketti - 6:4, 6:3, 7:6 (7:5).
Úsh saǵattaı ýaqytqa sozylǵan tartysty báseke barysynda Býblık 28 eıs jasap, 12 breık-poınttyń ekeýin ǵana paıdalandy. Qarsylasy 5 eıs, 3 breıkpen (8 breık-poınt) kózge tústi.
Osylaısha, júlde qory 60 mln dollarǵa baǵalanǵan AQSH ashyq chempıonatynda jekeleı synda Qazaqstannan Iýlıa Pýtınseva ǵana qaldy.
Eske sala keteıik, budan buryn Aleksandr Býblıktiń AQSH ashyq chempıonatynyń ekinshi aınalymyna shyqqanyn jazǵan bolatynbyz.
Al Elena Rybakına atalǵan chempıonatta jeńilip qaldy.
Iýlıa Pýtınseva týrnırdi jeńispen bastady.