Qazaqstannyń iri jumys berýshileri maman izdep jatyr.
Qazaqstan Úkimeti aldaǵy kúnderi onlaın-túrde eńbek jármeńkesin ótkizedi, dep habarlaıdy Almaty-akshamy.kz.
«Qazaqstannyń iri jumys berýshileri jastarǵa arnalǵan alǵashqy bos jumys oryndarynyń onlaın-jármeńkesine qatysady. 27-29 maýsym kúnderi Elektrondy eńbek bırjasynda qazaqstandyq kompanıalardyń HR-menedjerleri óz mekemesin tanystyrady. Olardan ár úmitker ózin qyzyqtyrǵan aqparatty suraı alady. Bos jumys oryndary jármeńkesine 18-35 jas aralyǵyndaǵy ár Qazaqstan azamaty qatysýǵa quqyly. Ol úshin Enbek.kz portalynda tirkeýden ótý qajet», - delingen Eńbekmıni baspasóz qyzmetiniń habarlamasynda.
Tirkelý úshin portaldyń basty betindegi jármeńke bannerin basyp, ótinim berý kerek. Onda jármeńkege qatysý erejelerimen jáne baǵdarlamasymen tanysýǵa bolady.
Bos jumys oryndary jármeńkesinde jumys berýshiler onlaın-tanystyrylym ótkizip, ózderiniń kompanıasy, eńbek jaǵdaıy, bos jumys oryndary jáne ózge de aqparat týraly aıtyp beredi.
Jármeńkede 1300-den astam bos jumys ornyn Eýrazıalyq topqa (ERG) jáne Respýblıkalyq taý-ken óndirýshileri jáne taý-ken metalýrgıalyq kásiporyndar qaýymdastyǵynyń quramyndaǵy kompanıalar usynady.
Qatysýshylar kompanıalardaǵy bos oryndarǵa qyzyǵýshylyq tanytqan jaǵdaıda túıindemesin jibere alady. Sondaı-aq, aldyn ala ótinim boıynsha qatysýshylardyń tizimi jasalady, olar kompanıanyń HR-menedjerimen onlaın suhbattasa alady.
Elektrondy eńbek bırjasyndaǵy onlaın-jármeńkeni QR Eńbek jáne halyqty áleýmettik qorǵaý mınıstrligi men «Eńbek resýrstaryn damytý ortalyǵy» AQ birlesip uıymdastyrdy.
Jármeńke jumys izdeýshige jumys tabýdy jeńildetedi. Al jumys berýshilerge bos jumys ornyna laıyqty qyzmetker tabýǵa múmkindik beredi.