QR Úkimetiniń kezekti otyrysynda QR Úkimetiniń 2023 jylǵa arnalǵan zań jobalaý jumystary josparynyń oryndalý barysy jáne QR Úkimetiniń 2024 jylǵa arnalǵan zań jobalaý jumystary josparynyń jobasy qaraldy. Atalǵan másele boıynsha ádilet mınıstri Azamat Esqaraev baıandama jasady.
Mınıstrdiń aıtýynsha, Úkimettiń zań jobalaý jumystarynyń 2023 jylǵa arnalǵan jospary Parlament Májilisine 32 zań jobasyn ázirleýdi jáne engizýdi kózdegen bolatyn. Jyl ishinde Josparǵa 7 ózgeris engizildi. 4 zań jobasy boıynsha engizý merzimderi aýystyryldy, memlekettik-jekeshelik áriptestik máseleleri boıynsha zań jobasy alynyp tastaldy jáne 8 jańa joba tolyqtyryldy, dep habarlaıdy Almaty-akshamy.kz.
Primeminister.kz saıtynyń málimetinshe, qazirgi ýaqytta 32 jobanyń beseýine Memleket basshysy qol qoıdy, 20-sy Parlamenttiń qaraýynda jatyr, beseýi – Úkimettiń qaraýynda, eki zań jobasy – memlekettik organdardyń kelisýinde. Óz kezeginde mınıstrlikterdiń qaıta qurylýyna, sondaı-aq bıznes-qoǵamdastyqpen tujyrymdamalyq máselelerdi pysyqtaýǵa baılanysty Sý jáne Qurylys kodeksteriniń jobalary boıynsha jumys jalǵasyp jatyr.
«Memlekettik organdar zań jobalaý jumysyn nashar josparlaǵanyna nazar aýdarǵym keledi, onyń nátıjesinde merzimder jıi ózgerip, Jospardan alyp tastaý faktileri oryn aldy. Mysaly, Sý kodeksiniń Josparǵa sáıkes engizý merzimderi eki ret túzetilip, sondaı-aq Úkimetke merzimi buzyla otyryp engizildi», — dedi Azamat Esqaraev.
Budan basqa Jospardan tys 18 zań jobasy ázirlendi, 70-ke jýyq jekelegen túzetý toptamasyna bastamashylyq jasaldy, sondaı-aq bul zań jobalaý jumysynyń tıisti dárejede josparlanbaǵanyn kórsetedi.
«Joǵaryda aıtylǵandardy eskere otyryp, memlekettik organdarǵa zań jobalaý jumysyn josparlaý kezinde boljamdy-taldamalyq jumysty kúsheıtýdi tapsyrýdy suraımyn», —dedi ádilet mınıstri Azamat Esqaraev.
Ári qaraı mınıstr 2024 jylǵa arnalǵan Jospar jobasy týraly aıtyp ótti. Atap aıtqanda, Úkimettiń zań jobalaý jumystarynyń 2024 jylǵa arnalǵan josparynyń jobasy memlekettik organdardyń usynystary negizinde ázirlenip, 21 qyrkúıekte Zań jobalaý qyzmeti jónindegi vedomstvoaralyq komısıada maquldandy.
Bastapqyda Jospar jobasynda 16 zań jobasyn ázirleý kózdelgen bolatyn. 7 qarashada ony tanystyrý barysynda negizgi erejeleri, sondaı-aq olardy ázirleý negizderi baıandaldy. Búginde Josparǵa shamaly ózgerister engizildi. Atap aıtqanda, Parlament depýtattarynyń uqsas zań jobasyna bastamashylyq jasaǵanyna baılanysty taýarlardyń shyǵarylǵan elin aıqyndaý máseleleri boıynsha zań jobasy Jospar jobasynan alyp tastaldy. Arhıv isi jáne mádenıt meáseleleri boıynsha jáne «Kásibı parasattylyqqa testileý týraly» zań jobalary qosymsha engizildi.
Ádilet mınıstriniń aıtýynsha, usynylyp otyrǵan Jospar jobasynda Prezıdent Ákimshiliginiń eskertýleri eskerilgen. Pysyqtalǵan Jospar jobasy 18 zań jobasyn ázirleýdi kózdeıdi, onyń ishinde Parlamentke birinshi jartyjyldyqta úsh, ekinshi jartyjyldyqta 15 zań jobasyn engizý josparlanyp otyr.
«Atalǵan zań jobalarynyń konsýltatıvtik qujattary vedomstvoaralyq komısıada maquldandy», — dedi ádilet mınıstri Azamat Esqaraev.