8–10 qazan kúnderí Jambyl atyndaǵy memlekettík akademıyalyq fılarmonıyada kompozıtor, dırıjer, KSRO men Qazaqstannyń halyq ártísí, «Halyq qaharmany» memlekettík syılyǵynyń laureaty, Nūrǵısa Atabaıūly Tílendıevtíń 100 jyldyq mereıtoıyna arnalǵan respublıkalyq dırıjerler baıqauy ótedí. Būl jónínde Almaty qalasy óńírlík kommunıkatsıyalar qyzmetíníń kóshpelí brıfıngínde habarlandy.
Baıqau Qazaqstan Respublıkasynyń Mádenıet jáne aqparat mınıstrlígíníń qoldauymen ūıymdastyrylyp otyr. Negízgí maqsaty – otandyq dırıjerlík mektep dástúrín saqtap, damytu, jańa esímderdí anyqtau, jas talanttarǵa qoldau kórsetu jáne ūlttyq mádenıettíń bedelín halyqaralyq deńgeıde arttyru.
Shyǵarmashylyq synǵa elímízdíń jas talanttary men muzyka unıversıtetteríníń 18 ben 35 jas aralyǵyndaǵy studentterí qatysady. Baıqau ekí kezeńnen tūrady. Barlyq shyǵarma N.Tílendıev atyndaǵy akademıyalyq folklorlyq-etnografıyalyq «Otyrar sazy» orkestrín súıemeldeuímen oryndalady.
Orkestrdíń kórkemdík jetekshísí árí bas dırıjerí, kompozıtordyń qyzy Dínzuhra Tílendıeva baıqaudyń mańyzdylyǵyna toqtalyp: «Būl tek jas dırıjerlerdíń jarysy ǵana emes. Ákemníń baı mūrasymen jaqynyraq tanysyp, onyń shyǵarmashylyǵyna qanyǵyp, sol serpíndí jas buynǵa jetkízudíń erekshe múmkíndígí», – dedí ol.
Jambyl atyndaǵy memlekettík akademıyalyq fılarmonıya dırektory Aqan Abdualıev baıqaudyń kompozıtordyń mereıtoıymen qatar keluí erekshe mánge ıe ekenín atap óttí. «Nūrǵısa Tílendıevtíń 100 jyldyq mereıtoıy elímíz boıynsha keń kólemde atalyp ótíp jatyr. Almatyda baıqaudyń ūıymdastyryluy – sımvoldyq mání bar oqıǵa. Bíz būl joba tájírıbe almasuǵa úlken múmkíndík beríp, jańa esímderdí anyqtaıtynyna senemíz», – dedí fılarmonıya basshysy.
Jeńímpazdardy mádenıet pen óner salasynyń tanymal qaıratkerlerínen qūralǵan qazylar alqasy anyqtaıdy. Laureattarǵa mynadaı marapattar tabystalady:
• Gran-prı
• I, II jáne III oryndar
• Arnauly dıplomdar, sonyń íshínde «Nūrǵısa Tílendıev shyǵarmalaryn úzdík oryndaǵany úshín» júldesí.
Baıqau qorytyndysy boıynsha jeńímpazdardy marapattau rásímí men gala-kontsert 10 qazan kúní saǵat 19:00-de Jambyl atyndaǵy memlekettík akademıyalyq fılarmonıyanyń Úlken zalynda ótedí.