Almatynyń Alataý aýdanyndaǵy 60 myńnan astam turǵyn medısınalyq qyzmettermen qamtylatyn bolady
Almaty ákimi Erbolat Dosaev jumys sapary jáne halyqpen eseptik kezdesý aıasynda Alataý aýdanynyń «Nurkent» shaǵyn aýdanynda aýysymda 400 adam qabyldaıtyn jańa jeke klınıkada boldy, dep habarlaıdy almaty-akshamy.kz
Medısınalyq ortalyq bıyl mamyr aıynda ashyldy. Kepildik berilgen kólem aıasynda tirkelgen halyq úshin tegin medısınalyq qyzmetter kórsetiledi. Bul jedel járdem, shuǵyl stasıonarlyq jáne ambýlatorıalyq kómek, onkologıalyq kómek, týberkýlez kezindegi pallıatıvtik kómek, beıindi mamandardyń konsýltasıasy, ońaltý, belgili bir aýrýlar jáne dári-dármekter tizimi boıynsha buıryqqa sáıkes dári-dármekpen qamtamasyz etý. Búginde medısınalyq ortalyqqa aýdannyń 23,2 myń turǵyny tirkelgen.
Almaty ákimi jumys sapary barysynda klınıkanyń qyzmetimen tanysyp, ujymmen kezdesti. Alańy 5,5 myń sharshy metr ǵımarat zamanaýı medısınalyq jabdyqtarmen jabdyqtalǵan. Klınıkanyń ereksheligi-bronh demikpesi, bronhıt jáne pnevmonıa aýrýlaryn emdeýge arnalǵan tuz shahtasynyń, sondaı-aq estý qabiletiniń buzylýyn anyqtaý maqsatynda jańa týǵan náresteler men 6 jasqa deıingi balalardaǵy estý qabiletin anyqtaýǵa baǵyttalǵan aýdıo skrınıng apparatynyń bolýy.
Erbolat Dosaev qala turǵyndaryna sapaly medısınalyq kómek kórsetýdiń mańyzdylyǵyn atap ótti.
«Halyqqa yńǵaıly bolý úshin jańa tehnologıalardy engize otyryp, kórsetiletin medısınalyq qyzmetterdiń sapasyn arttyrý mańyzdy. Biz árqashan osyndaı mańyzdy áleýmettik nysandardy iske asyrýǵa qatysatyn mesenattardy qoldaımyz», - dedi megapolıs basshysy.
Aıta keterligi, «Nurkent» shaǵyn aýdanynda memlekettik medısınalyq mekemeler joq. Eń jaqyn №29 qalalyq emhana «Zerdeli» shaǵyn aýdanynda ornalasqan. Jeke klınıkanyń ashylýy «Nurkent», «Aqkent», «Zerdeli», «Alǵabas», «Terekti» jáne «Daraboz» shaǵyn aýdandarynyń 60 myńnan astam turǵynyn medısınalyq qyzmetpen qamtýǵa múmkindik berdi jáne bul qalalyq emhananyń júktemesin azaıtty.
