Byltyr Alataý aýdanyndaǵy ınjenerlik jelilerdi jańǵyrtýǵa qatysty 2017 jyldan bastap turǵyndardy alańdatqan eń ózekti máseleniń biri 14-aýmaq shaǵyn aýdanynyń máselesi sheshimin tapty. Jalpy somasy 2,7 mlrd teńgege qurylysy aıaqtalmaı qalǵan 16 problemalyq kósheniń sý (7,5 km) jáne káriz jelileri (7,5 km) tolyǵymen aýystyrylyp, asfált jabyndysy qalpyna keltirildi. Bul týraly Almaty ákimi Erbolat Dosaev Alataý aýdanynyń turǵyndarymen kezdesý barysynda habarlady.
Qala basshysy qazirgi ýaqytta aýdan ákimdigi tarapynan Ójet shaǵyn aýdanynda káriz sorǵy stansıasy jáne 228 km bolatyn Alǵabas, Shapaǵat, Bolashaq shaǵyn aýdandarynda sý jáne káriz jelilerin salý jumystaryn jalǵastyryp jatqanyn atap ótti. Bul jumystyń josparlanǵan aıaqtalý merzimi - 2024 jyldyń sońy.
«Shańyraq-2 shaǵyn aýdanyndaǵy jańa salynǵan jelilerdi paıdalanýǵa berý úshin osy aıdyń aıaǵyna deıin 6 káriz-sorǵy stansıasy iske qosylady. Sondaı-aq, 2024 jylǵy sáýirdiń sońyna deıin Qarasý shaǵyn aýdanynda salynǵan 2 káriz-sorǵy stansıasy iske qosylady», - dedi Erbolat Dosaev.
Bıyl sáýir aıynda Áıgerim shaǵyn aýdanynda káriz-sorǵy stansıasyn jáne Saıaly, Boraldaı jáne Aqbulaq shaǵyn aýdandarynda 87,4 km sýmen jabdyqtaý jáne káriz jelilerin salý boıynsha jumystar josparlanǵan. Terekti jáne Samǵaý shaǵyn aýdandarynyń ınjenerlik jelilerin damytý aıasynda eki joba túzetýge berildi. Saraptama qorytyndysyn alý 2024 jyldyń sáýiri men tamyz aılaryna josparlanǵan.