Almaty ákimdigi bıznes ókilderin tartyp, qalany kórkeıtý jumystaryn jalǵastyryp keledi
Almaty ákimdigi iri qurylys kompanıalaryn qalanyń ınfraqurylymyn damytýǵa tartý isin jalǵastyryp keledi. Áleýmettik jaýapkershilik qaǵıdatyn iske asyrý aıasynda RAMS Qazaqstan qurylys kompanıasy Alataý aýdanynda, Momyshuly kóshesinde, D. Qonaev meshitiniń qarama-qarsy betinde 25 gektar aýmaqty qamtıtyn zamanaýı saıabaq salýǵa 6 mlrd teńgeden astam qarjy quıýdy josparlap otyr.
Qurylys-montajdaý jumystary 2025 jyly qyrkúıekte bastalyp, 2026 jyly jazda aıaqtalmaq. Jańa saıabaq Almatynyń polısentrlik damýy aıasynda jaıly qalalyq orta qalyptastyrýda erekshe mánge ıe bolmaq.
Joba aıasynda saıabaq aýmaǵynda kórikti jaıaý júrginshiler jáne velosıped joldary salynyp, balalar men sport alańdary, tynysh demalys aımaqtary men zamanaýı landshaftyq dızaın elementteri jasaqtalmaq. Jasyl jelekke erekshe kóńil bólinip, bıiktigi 4-6 metrden asatyn 500-den asa iri aǵash otyrǵyzý kózdelgen.
Saıabaq aımaǵy ár turǵynnyń qajetine saı oılastyrylyp, balamen serýendeıtin otbasylardan bastap jastar men qarttarǵa deıin barshaǵa qolaıly bolmaq.
Almaty ákimdigi áleýmettik jaýapkershiligi joǵary bıznes ókilderimen birlesip, osyndaı jasyl jelekke toly demalys oryndaryn kóbeıtip, qala turǵyndaryna jaıly orta qalyptastyrý isin tabandy túrde jalǵastyra bermek.