Ispanıanyń Melıle qalasynda ótip jatqan 2024 jylǵy komandalyq chempıonatynda qyzyqty oqıǵa oryn aldy. 22 jastaǵy Kırıll Shevchenko, C.A. Silla - Integrant Col·lectius komandasynyń múshesi, chempıonatqa qatysýshylar qatarynan shyǵaryldy., dep habarlaıdy aqshamnews.kz.
Al onyń birinshi jáne ekinshi týrdaǵy jeńisteri men teń oıyndary jeńilis dep sanaldy. Oǵan alaıaqtyqpen aınalysqany týraly aıyp taǵyldy.
Bul sheshimdi sharanyń bas sýdıasy Oskar Brýno de Prado Rodrıges qabyldady. Ol Shevchenkonyń ádiletsizdik jasaǵanyna qatysty eshqandaı kúmán qalmaǵanyn málimdedi.
Tekserý barysynda shahmatshynyń oıyn barysynda jıi dárethanaǵa ketip qalǵany, biraq arbıtrlerge aldyn ala habarlamaǵany anyqtaldy. Keshkisin edent jýýshy dárethanadan telefon taýyp alyp, chempıonat ótip jatqan qonaqúıdiń ákimshiligine bergen. Kelesi kúni sol dárethanada taǵy da telefon tabyldy, al Shevchenko dál osy kabınkaǵa jıi kirgen.
Sýdıanyń suraýy boıynsha shahmatshynyń dárethanaǵa jeke ketýine baqylaý ornatyldy. Uıymdastyrýshylar Shevchenkonyń telefon tabylǵannan keıin de dárethanaǵa kirip, álgi kabınkanyń esigi jabyq bolsa, basqalaryna kirmeı sony ashylǵanyn kútetinin baıqaǵan.
«Tekserý barysynda jınalǵan dálelderge súıene otyryp, men osy shahmatshynyń oıyn barysynda mobıldi telefon qoldanǵanyna tolyq senimdimin. Sondaı-aq, ol oıyn zalyn tastap ketkende maǵan habarlaýdy nemese suranýdy oryndamady. Bul FIDE erejelerin buzýdy bildiredi», — dedi chempıonattyń bas sýdıasy Chess.com saıtyna bergen suhbatynda.
Oqıǵa týraly esep, barlyq dáleldermen birge Ispanıa shahmat federasıasynyń (FEDA) sýdıalyq komıtetine jáne FIDE etıkalyq komısıasyna jiberildi.
Kırıll Shevchenko — 22 jastaǵy shahmatshy. Ýkraınada týǵan, 2023 jyldan beri Rýmynıa úshin oınap júr. Ol álemdik reıtıńte 69-orynda, 14 jasynda grosmeıster atanǵan.