Keıingi jyldary elimizde azamattardyń jeke deregin paıdalanyp, olardyń atyna zańsyz nesıe resimdeýi jıilep ketti. Mundaı jaǵdaıǵa tap bolǵanda ne isteý kerek? Atyńyzǵa nesıe resimdelgenin qalaı bile alasyz? Kredıttik tarıhyńyzdy júıeli túrde tekserińiz, dep habarlaıdy aqshamnews.kz.
Elimizde árbir azamat jylyna bir ret kredıttik tarıhyn tegin surata alady. Muny birneshe jolmen jasaýǵa bolady:
eGov.kz portaly arqyly. Portalda avtorızasıadan ótip, «Jeke kredıttik esepti alý» qyzmetin tabyńyz. Ótinishti toltyryp, ony elektrondyq sıfrlyq qoltańba (ESQ) kómegimen rastańyz.
Birinshi kredıttik búro arqyly. 1cb.kz saıtyna kirińiz nemese 1CB.kz mobıldi qosymshasyn paıdalanyńyz. ESQ arqyly ótinim berip, kredıttik tarıhyńyzdy tekserińiz.
HQKO-ǵa júginý arqyly. Halyqqa qyzmet kórsetý ortalyǵyna (HQKO) baryp, kredıttik tarıhyńyzdy tekserýge bolady. Kredıttik tarıhyńyzdy aıyna keminde bir ret tekserip otyrǵan jón. Qaıda júgingen jón?
Nesıe resimdelgen bankke nemese qarjy uıymyna júginińiz. Nesıeniń qaı bankten nemese mıkroqarjy uıymynan alynǵanyn anyqtańyz. Sol uıymǵa jazbasha aryz berip, bul nesıeni siz almaǵanyńyzdy jetkizińiz.
Nesıe kelisimshartynyń kóshirmesin jáne nesıe resimdeý kezinde paıdalanylǵan qujattardy talap etińiz. Eger jeke kýáligińizdi joǵaltqan bolsańyz nemese urlatyp alsańyz, bul týraly anyqtamany bankke usynyńyz.
Polısıaǵa aryz jazyńyz. İshki ister organdaryna baryp, alaıaqtyq faktisi boıynsha ótinish berińiz. Barlyq jınalǵan qujatty (bank jaýaptary, kredıttik esep, jeke kýálik kóshirmesi, t.b.) qosa tirkeńiz. Ótinishińizdiń tirkelgenin rastaıtyn talon alyńyz.
Qarjy naryǵyn retteý jáne damytý agenttigine shaǵymdanyńyz. Eger bank nesıe resimdeý deregin berýden bas tartsa nemese jaǵdaıdy sheshpese, Qarjy naryǵyn retteý jáne damytý agenttigine shaǵym jazyńyz. Agenttik qarjy uıymdarynyń zańsyz áreketin tekserýge quqyly.
Sotqa júginińiz. Eger bank nesıeni esepten shyǵarýdan bas tartsa, sotqa aryz berip, kelisimdi jaramsyz dep taný týraly talap qoıa alasyz. Sot sheshimi shyqqannan keıin nesıe búrosyna nesıe týraly jalǵan aqparatty alyp tastaý jóninde ótinish jiberińiz.
Eger sizdiń atyńyzǵa alaıaqtar nesıe resimdese, der kezinde áreket etý mańyzdy. Bankke, polısıaǵa jáne qarjy retteýshi organdarǵa júginip, quqyńyzdy qorǵańyz. Erterek qamdansańyz, máseleni ońtaıly sheshýge bolady.