Ál-Farabı atyndaǵy Qazaq ulttyq ýnıversıteti qalashyǵynda stýdentterge arnalǵan 5000 oryndyq jańa jataqhanalar qurylysynyń kapsýlasyn salý rásimi ótti.
Toǵyz qabatty bes jańa jataqhana QazUÝ qalashyǵy qurylysynyń II damý jospary aıasynda boı kóteredi.
Stýdenttik jataqhanalardyń qurylysyn iske asyrýda Qytaıdyń «Chjýntaıhýa» Baoszı qurylys eńbek qyzmetteri kompanıasy» ınvestor retinde tartyldy.
Aıtýly sharaǵa ýnıversıtet basshylyǵy, qurylys kompanıasy ókilderi, oqý ordasynyń tanymal túlekteri, oqytýshy-professorlar quramy men stýdent jastar qatysty.
Saltanatty rásimde Ál-Farabı atyndaǵy QazUÝ-dyń Basqarma Tóraǵasy – Rektor Janseıit Túımebaev sóz sóılep, bul bastamanyń ýnıversıtet tarıhyndaǵy strategıalyq mańyzyna toqtaldy.
«2022 jyly Qazaqstan Prezıdenti Qasym-Jomart Kemeluly Toqaevtyń qoldaýymen QazUÝ qalashyǵy qurylysynyń ekinshi kezeńi bastalǵan bolatyn. Jańa jataqhanalar jastardyń bilim alýyna, ǵylymı-zertteý jumystaryna jáne áleýmettik beıimdelýine oń áserin tıgizedi», – dep atap ótti rektor.
Sonymen qatar jıynda Baoszı qalasynyń qurylys jáne eńbek qyzmetteri jónindegi «Chjýntaıhýa» kompanıasynyń dırektory Chjan Hýnsán quttyqtaý sóz sóılep, jobanyń halyqaralyq áriptestik aıasynda júzege asatynyn jáne qurylys sapasyna erekshe mán beriletinin jetkizdi.
Shara barysynda bolashaq urpaqqa arnalǵan joldaý hatqa qol qoıylyp, saltanatty túrde kapsýla jerge qoıyldy.
«Biz QazUÝ-dy damytý men jańǵyrtýdyń jańa dáýiriniń tabaldyryǵynda turmyz. Bul – sapaly bilim alýǵa, ǵylymı qyzmetti damytýǵa jáne stýdenttik ómirdi jańa deńgeıge kóterýge tyń múmkindikter ashatyn tarıhı sát. Stýdenttik jataqhanalar qurylysy aıasynda atqarylyp jatqan barlyq jumystar bilim alýshy jastar men ýnıversıtettiń profesor-oqytýshylar quramy úshin laıyqty, zamanaýı jáne jaıly jaǵdaılar jasaýǵa baǵyttalǵan. Osy jataqhanalarda turyp, ýnıversıtet qabyrǵasynda bilim alǵan stýdentter elimizdiń damýy men órkendeýine eleýli úles qosatynyna nyq senemiz», – delingen hatta.
Joba bilim alýshylar úshin qolaıly ári qaýipsiz orta qalyptastyrýǵa baǵyttalǵan. Jalpy aýmaǵy 66 myń sharshy metrdi quraıtyn keshen 5000-nan astam orynǵa eseptelgen. Investısıa kólemi shamamen 33,8 mıllıard teńgeni quraıdy.
Qurylys jumystary 2026 jyldyń qańtar aıynda bastalyp, bir jarym jyl ishinde aıaqtalady dep josparlanǵan. Jataqhanalar halyqaralyq standarttarǵa saı jabdyqtalyp, qaýipsizdik júıeleri men turmystyq ınfraqurylym tolyq qamtylady.
Atalǵan joba stýdentterdiń turǵyn úıge qoljetimdiligin arttyryp, ásirese ózge óńirlerden jáne shetelden kelgen bilim alýshylar úshin úlken múmkindik bolmaq.
1934 jyly 15 qańtarda Almaty qalasynda Qazaq memlekettik ýnıversıteti quryldy. (1934-2024)
1966 jyly Dinmuhamed Ahmetuly Qonaevtyń sheshimimen arnaıy jer telimi bólinip, 1972 jyly QazUÝ qalashyǵyndaǵy alǵashqy qurylys jumystary bastaldy.
«Elý jylda – el jańa». Araǵa týra jarty ǵasyr ýaqyt salyp, QazUÝ qaıta túledi. (1972-2022)