Bas prokýrordyń orynbasary Ulan Baıjanov elden zańsyz shyǵarylǵan aktıvterdi qaıtarý máselesimen aınalysatyn arnaýly vedomstvonyń shtaty qalaı qurylatynyn túsindirdi, dep habarlaıdy Almaty-akshamy.kz.
Ol bul organnyń tezirek qurylýyna múddeli ekenin aıtty. Biraq, bul jerde osy vedomstvo jumysynyń ereksheligin eskerý qajet.
«Biz moraldyq-etıkalyq normalar turǵysynan da, daıyndyq sapasy men quzyreti jaǵynan da laıyq mamandardy tańdaýymyz kerek. Osy zańnyń («Zańsyz ıemdelgen aktıvterdi memleketke qaıtarý týraly») orbıtasyna tartylatyn sýbektiler halyqaralyq konsaltıńtik, aýdıtorlyq, zańgerlik kompanıalardy jaldaýǵa múmkindigi bar aýqatty adamdar ekenin túsinýimiz kerek. Olar óte jaqsy qorǵalǵan. Bul turǵyda bizdiń jaqtan da osyndaı joǵary deńgeıdegi mamandar bolýy kerek. Sondyqtan, jumysqa qabyldaý máselesine erekshe kóńil bólinedi. Osy oraıda, jumysqa alynatyn qyzmetkerlerge qatysty qoıylatyn tıisti talaptardy ázirleýge kirisip jatyrmyz», - dedi U. Baıjanov Senattyń jalpy otyrysynan keıin tilshiler suraǵyna jaýap bere otyryp.
Onyń aıtýynsha, shtat 130-ǵa jýyq adamnan quralýy múmkin. Onyń basym bóligi nemese jartysy aýqymdy derektermen jumys isteıtin ári derekterge taldaý júrgizetin aqparattyq saraptama ortalyǵynda qyzmet etedi.
«Tıisti anyqtamalyq jumystardy qamtyp, sarapshylar men mamandardy jumyldyramyz. Ózimizge paıdaly bolýy múmkin barlyq derekkózdi kóterip, onda kerek málimetterdi zertteımiz», - dedi Bas prokýrordyń orynbasary.
Budan buryn habarlanǵandaı, búgin Senattyń jalpy otyrysynda palata depýtattary «Zańsyz ıemdelgen aktıvterdi memleketke qaıtarý týraly» Zańdy maquldady. Zańda aktıvterdi qaıtarýdyń erikti nemese májbúrli tártibi kózdelgen.
Zańnyń negizgi maqsaty – Qazaqstan Respýblıkasynyń aýmaǵynda da, odan tys jerlerde de zańsyz ıemdelgen aktıvterdi qaıtarý úshin zańnamalyq parametrlerdi aıqyndaý, sondaı-aq olardy zańsyz ıemdenýge jáne shyǵarýǵa yqpal etken jaǵdaılardy joıý.
Bas prokýratýranyń qurylymynda zańsyz shyǵarylǵan aktıvterdi qaıtarý jónindegi jeke vedomstvo qurylady. Ol osy saladaǵy ýákiletti organnyń fýnksıalaryn oryndaıdy.