Mundaı saılaý buryn-sońdy elimizdiń tarıhynda bolmaǵan.
Búgin, 25 shildede, aýdandyq mańyzy bar qalalardyń, aýyldardyń, kentterdiń, aýyldyq okrýgterdiń ákimderiniń tikeleı saılaýy ótip jatyr, dep habarlaıdy Almaty-akshamy.kz
Saılaý 14 oblystaǵy 1847 saılaý ýchaskesinde ótýde. Aýmaqtyq saılaý komısıalarynyń málimetteri boıynsha, 730 saılaý okrýginde 2 582 kandıdat usynylǵan. Olardyń ishinde 2 297 úmitker tirkeýdiń sońǵy sátinde tirkelgen.
Úmitkerler quramynda: 1419 – ózin-ózi usyný jolymen, 878 – QR ÁM tirkelgen 6 saıası partıadan qatysady. Genderlik quram boıynsha: erler – 1839, áıelder – 458.
Qazaqstan Respýblıkasynyń Prezıdenti Qasym-Jomart Toqaevtyń 2020 jylǵy 1 qyrkúıektegi «Qazaqstan jańa naqty ahýalda: is-qımyl ýaqyty» atty el halqyna Joldaýynda 2021 jyldan bastap aýyl ákimderiniń tikeleı saılaýyn ótkizý týraly tapsyrma bergen bolatyn.
Bul bastama jergilikti ózin-ózi basqarý ınstıtýttarynyń jappaı praktıkasyn engizý arqyly memlekettik basqarýdy ortalyqsyzdandyrýǵa qatysty negizgi saıası reformalar paketin dáıekti iske asyrýǵa baǵyttalǵan.
Jergilikti basqarý men ózin-ózi basqarýdy reformalaý birqatar strategıalyq mindetterdi sheshýge baǵyttalǵan.
Birinshiden, jergilikti ózin-ózi basqarý organdaryn saılaýdy ashyq Memlekettik basqarý qaǵıdaty jáne «Halyq únine qulaq asatyn memleket» tujyrymdamasyn iske asyrý negizinde engizý.
Ekinshiden, azamattardyń aýyldyq aýmaqtardy damytýǵa jáne jergilikti mańyzy bar máselelerdi sheshýge qatysýyn keńeıtý.
Úshinshiden, atqarýshylyq jáne zańnamalyq ókilettilikterdi tómengi deńgeıge kezeń-kezeńimen berý.
Tórtinshiden, aýyl ákimderin tikeleı saılaý kezinde partıalardyń ókilettilikterin keńeıtý arqyly saıası básekelestikti damytý.