Astanada erlikpen qaza tapqan órt sóndirýshi Asqar Zabıkýlın týraly «Qaharman» serıaly túsirilip jatyr. Bul týraly onyń jesiri Anel Zabıkýlına óziniń Instagram paraqshasynda habarlady.
«Túsirý toby Astanaǵa kelip, birden jumysqa kiristi. Árıne, búkil prosesti óz kózimizben kórý múmkindigin jiberip almadyq. Aıta keteıin, kıno túsirý ońaı emes. Biz ol jerde 5 saǵattaı boldyq. Túsirilimge daıyndyq, birneshe dúbl, rakýrs, jaryq. Bul – bir ǵana kórinisti túsirý kezinde kórgen qıyndyqtyń kishkene ǵana bóligi. Barlyq túsirilim tobyna qajyrly eńbegi úshin rahmet. Serıal barlyǵyna unaıdy dep senemin», – dep jazdy Anel Zabıkýlına.
Aıta keteıik, byltyr qarashada elordada 15 qabatty úıden órt shyǵyp, saldarynan 3 adam, onyń ishinde bir bala aýrýhanaǵa túsken bolatyn. Birneshe adamdy qutqarǵan órt sóndirýshi Asqar Zabıkýlınniń denesiniń 80%-yn kúıik shalyp, jansaqtaý bólimine jatqyzylady. Ókinishke qaraı, birneshe kúnnen soń kóz jumdy.
Marqumnyń jary paraqshasyna taǵy bir áserli foto jarıalady. Onda kishkentaı qyzy serıaldyń basty keıipkeri – ákesiniń rólin somdap jatqan akterdy qushaqtap tur. «Kınodaǵy ákesin qushaqtap turǵan qyzymnyń kishkentaı ǵana júregin men jaqsy túsinemin, órt sóndirýshi formasyndaǵy er adamdardan ákesin kóretindeı... arasynan ákesi shyǵa keletindeı...» dep jazdy sýret astyna.
Órt sóndirýshi Asqar Zabıkýlın I dárejeli «Aıbyn» ordenimen marapattaldy. 20 jeltoqsanda oǵan «Altyn adam» syılyǵy tabys etildi. Esimi elordanyń jańa kósheleriniń birine berildi.