Ýchaskelik saılaý komısıalarynyń jumysyna kedergi jasamaý kerek - A.Qalyqova.
Bul týraly Óńirlik komýnıkasıalar qyzmetiniń alańynda ótken brıfıńte ASK tóraıymy Aıgúl Qalyqova aıtty, dep habarlaıdy Almaty-akshamy.kz.
«Ýchaskelik komısıanyń is-áreketi zań aıasynda - olar daýys berý úshin alǵan búletenderdi qaıta sanaýǵa mindetti. Bizde kandıdatýralaryn alyp tastaǵan nemese zań buzýshylyqtarǵa baılanysty keri qaıtarylǵan kandıdattardyń sany aıtarlyqtaı kóp. «Qazaqstan Respýblıkasyndaǵy saılaý týraly» zańǵa sáıkes, Qazaqstan Respýblıkasy Ortalyq saılaý komısıasynyń 2018 jylǵy 19 qyrkúıektegi №16/20 qaýlysynda bekitilgendeı, kandıdattyqty alyp tastaý, kandıdatty usyný týraly sheshimniń kúshin joıý, kandıdattardy, partıalyq tizimderdi tirkeý týraly sheshimniń kúshin joıý týraly ister boıynsha saılaý búletenderin ózgertý qaǵıdalary bekitildi, ýchaskelik saılaý komısıalary bul jumysty daýys berý kúnine deıin júrgizýge mindetti», - dedi A.Qalyqova.
Iaǵnı, daýys berý kúni búletende qalǵan kandıdattar ǵana bolýy kerek. Bul Erejede búletenderden shyǵarylatyn kandıdattardyń aty-jóni qalaı alynyp tastalatyny naqty sıpattalǵan.
Almaty aýmaqtyq saılaý komısıasynyń málimetinshe, 16 naýryzǵa deıin keıbir kandıdattar tirkeýden alynyp, saılaýǵa qatyspaıdy. Alaıda, osy kezge deıin myńdaǵan búletender basylyp shyqqan bolatyn. Sondyqtan da bul kúnderi ýchaskelik saılaý komısıalarynyń músheleri daýys berý kúnine daıyndaý úshin búletenderden olardyń málimetterin syzyp tastaýǵa májbúr.
Máselen, úshinshi saılaý okrýgi boıynsha Májilis depýtattyǵyna 38 úmitker bolsa, qazir olardyń sany - 30. Búletenderden segiz adamnyń esimin alyp tastaý kerek jáne bul aldyn ala jasalýy kerek. Besinshi okrýgte 34 boldy, 24 qaldy.
Olar zań aıasynda jumys isteıdi, degenmen BAQ-ta durys aqparat berilmedi, bul keıbir kandıdattardyń senim bildirilgen adamdarynyń saılaý ýchaskelerine kelýine túrtki boldy.
Aıgúl Qalyqova ýchaskelik saılaý komısıalarynyń jumysyna kedergi jasamaýǵa shaqyrdy. Olar búgin jáne erteńnen keshiktirmeı árbir búletennen shyǵyp qalǵan kandıdattardy syzyp tastaýǵa mindetti.
Sondaı-aq, Almaty ASK tóraıymy saılaý ýchaskelerinde partıalyq plakattar ilýli turǵany, biraq bir mandatty kandıdattar týraly aqparat joq degen aqparatqa qatysty pikir bildirdi.
Aıgúl Qalyqovanyń aıtýynsha, barlyq aqparattyq plakattar daıyndalǵan. Erteń, 18 naýryz kúni túske deıin olar ýchaskelik komısıalardyń aqparattyq stendterine ornalastyrylady. Zańǵa sáıkes, bul aqparattyq plakattar belgili bir ýaqytqa ilinýi tıis degen talaptar joq. Bul talap, ásirese, saılaý kúnine qatysty.