Kópshilikke keńninen tanymal «Avatar» fılmi qazaq tilinde kórsetiledi. Bul týraly Almaty-akshamy.kz Inform.kz-ke silteme jasap habarlaıdy.
«Dostar, sizderdi keremet jańalyqtan habardar etkim kelip otyr. Osy jeksenbiden bastap elimizdiń kınoteatrlarynda kınematografıa tarıhyndaǵy eń joǵary kasaly jáne kórermender tarapynan zor súıispenshilikke ıe bolǵan «Avatar» fılmi jańartylǵan beınede, óńdelgen dybyspen qazaq tilinde qalyń kórermenge jol tartady.
Túpnusqany qaıta shyǵarýdaǵy maqsat – keıingi onjyldyqtyń eń aıtýly fılmi bolady dep kútilip otyrǵan «Avatar: Sý joly» ekinshi bóliminiń shyǵýymen oraılastyrylyp otyr. Onyń da premerasy ana tilimizde bıyl 16 jeltoqsanda bolady.
Qazaqstandyq shyǵarmashylyq dýbláj toby fılm mátinin qazaq tiline aýdarý, onyń lokalızasıasy jáne dybystaý boıynsha sapaly jumys atqardy.
Budan bólek, Mádenıet jáne sport mınıstrligi «Intervıdeo» kompanıasymen birlesip álemdik premerasy aldaǵy 10 qarashada ótetin MARVEL áleminiń «Qara pantera: máńgi Vakanda» fılmin de qazaq tiline dýblájdaıtynyn aıta ketkim keledi.
Aldaǵy ýaqytta da osy baǵyttaǵy jumystardy qarqyndy jalǵastyryp, kartınalardyń qazaq tilindegi prokatyn kóbeıte beretin bolamyz»,-dep jazdy mınıstr.