Qazaq tilin damytý jobalary men baıqaýlary jaqynda bastalady.
BI Group qurylys holdıńi Qazaq Tili Endowment Qory-na 100 mln teńge kóleminde úles qosady. Odan bólek, qazaq tilin qoldaýǵa arnalǵan startaptarǵa 50 mln teńge bólý týraly sheshim qabyldady, dep habarlaıdy Almaty-akshamy.kz
BI Group basshylyǵy men Halyqaralyq “Qazaq tili” qoǵamy qazaq tilin damytý baǵytyndaǵy jobalardy júzege asyrý úshin uzaqmerzimdi áriptestik ornatty. Holdıń Qazaq Tili Endowment Qory-na 100 mln teńge kóleminde úles qosady.
Oǵan qosa, BI Group basshylyǵy men Halyqaralyq “Qazaq tili” qoǵamy til úırenýge arnalǵan Qazaq Lingo qosymshasyn damytý, balalarǵa arnalǵan kitaptar men ózge de mańyzdy jobalardy birlese júzege asyrýǵa kelisim jasady. Holdıń osy jobalardy júzege asyrýǵa 50 mln teńge bóledi. Halyqaralyq “Qazaq tili” qoǵamy BI Group qoldaýymen qazaq tilindegi sapaly kontent qoryn kóbeıtý úshin túrli baıqaýlar uıymdastyrýdy da josparlady.
«Bizdiń kompanıa ulttyq biregeılikti qalyptastyrý men damytýda mańyzdy sanalatyn qoǵamdyq isterdiń únemi basynda keledi. Máselen, sheteldik fılmderdi qazaq tiline dýblájdaýǵa uzaq jyldardan beri qarjylaı qoldaý kórsetip kelemiz. BINOM ınovasıalyq mektepteri Ybyraı Altynsarın, Qanysh Sátpaev, Ábish Kekilbaev syndy qazaq aǵartýshylary men ǵalymdarynyń esimderimen atalady. Ulttyq kıim kúni, sondaı-aq, Qazaq tili kúni bizdiń korporatıvtik mádenıetimizdiń bir bólshegine aınaldy. Sondyqtan Memleket basshysynyń qazaq tilin damytý bastamasyn qoldaý – azamattyq paryzymyz. Halyqaralyq “Qazaq tili” qoǵamymen áriptestigimiz qazaq tilin damytýǵa baılanysty kóp iske muryndyq bolady dep senemiz», - deıdi BI Group dırektorlar keńesiniń tóraǵasy Aıdyn Rahımbaev.