Belgili saıasattanýshy ári Májilis depýtaty Aıdos Sarym memleket jáne qoǵam qaıratkeri Altynbek Sársenbaıulynyń ólimine qatysty óz pikirin bildirdi. «Sadaq media» arnasyna bergen suhbatynda ol bul qylmysqa Nursultan Nazarbaevtyń qatysy bar degen tujyrymdy negizsiz dep atady, dep habarlaıdy aqshamnews.kz
— Bul oqıǵada Nazarbaevty aıyptaýǵa dálel joq. Ras, kezinde Rysbek Sársenbaev aǵamyz emosıamen biraz pikir aıtty, áli de aıtyp júr. Biraq ádilet bolýy úshin naqty aıǵaq kerek. Nazarbaevtyń aty janama túrde atalǵanymen, ony naqty dáleldegen eshkim joq. Men óz basym bul iske Rahat Álıevtiń qatysy bolýy múmkin dep esepteımin, – dedi Aıdos Sarym.
Depýtattyń aıtýynsha, ol kezinde Altynbek Sársenbaıulymen tyǵyz jumys istegen, kóptegen qujattaryn ázirleýge atsalysqan.
— Altynbektiń qasynda júrgen Rysbek emes, men boldym. Sondyqtan bul — meniń de jeke tájirıbem men baıqaǵandarym, – dedi ol.
Sonymen qatar, Sarym marqum saıasatkerdiń minezine de toqtaldy.
— Altynbek kezinde óte kekshil adam boldy. Kóp adamdy unatpaıtyn. Máselen, Serik Ábdrahmanov pen Baltash Tursynbaevty jaqtyrmaıtyn. Biraq ýaqyt óte kele ózgerdi. Ómiriniń sońǵy kezeńinde burynǵy renishterin umytyp, kópshilikpen tatýlasyp, sabyrly bola bastady, – deıdi depýtat.