Mádenıet jáne aqparat mınıstri Aıda Balaeva Qazaqstan Jazýshylar odaǵy basqarmasynyń Tóraǵasy Mereke Qulkenovpen kezdesti.
Aıda Balaeva qalamgerlerdiń el birligin nyǵaıtýdaǵy, Ulttyq quryltaıda atap ótilgen qoǵamdyq qundylyqtardy dáripteýdegi rólin erekshe atap ótti, dep habarlaıdy aqshamnews.kz.
Sondaı-aq mınıstr Jazýshylar odaǵymen birlesken mádenı-shyǵarmashylyq is-sharalar ótkizý arqyly qalamgerlerge udaıy qoldaý kórsetip, yntymaqtastyqty damytýǵa nıetti ekenin aıtty.
Atap aıtqanda, bıyl Mádenıet jáne aqparat mınıstrligi Jazýshylar Odaǵymen strategıalyq áriptestik aıasynda «Jazýshylardyń ádebı sheberlik mektebi», «Jańa Qazaqstannyń ádebı-tanymdyq panoramasy» jáne «TMD elderiniń arhıvterindegi qazaqstandyq jazýshylardyń zertteý jumystary» jobalaryn birlese júzege asyrmaq.
Kezdesýde Jazýshylar odaǵynyń mereıli 90 jyldyǵyna jáne Berdibek Soqpaqbaev, Ábish Kekilbaev, Farıza Ońǵarsynova, Ospanhan Áýbákirov, İlıas Jansúgirov, Gerold Belger, Ábdijámil Nurpeıisov sekildi kórnekti qalamgerlerdiń mereıtoıyna arnalǵan birlesken is-sharalar jospary jan-jaqty talqylandy.
Sondaı-aq Jazýshylar odaǵynyń 90 jyldyǵyna oraı Abaı, Túrkistan, Atyraý oblystarynda jáne Astana, Almaty qalalarynda túrli taqyryptarda arnaıy pleným uıymdastyrylady, al qarasha aıynda mereıtoılyq saltanatty jıyn ótedi.
Mereke Qulkenov Jazýshylar odaǵynyń jańa shyǵarmashylyq jobalary men ádebıettegi qazirgi ózekti máselelerdi ortaǵa salyp, memleket tarapynan qalamgerler qaýymyna kórsetilip jatqan qoldaýǵa rızashylyǵyn bildirdi.
Aıta ketsek, bıyl Qazaqstan Jazýshylar odaǵynyń qurylǵanyna – 90 jyl. Búginde qoǵamdyq uıym 1000-nan asa avtordy biriktiredi.