Almaty qalasy Jumyspen qamtý jáne áleýmettik baǵdarlamalar basqarmasyna qarasty «Aıala» áleýmettik qyzmetter ortalyǵynyń qoǵamdaǵy orny erekshe. Sebebi, ol júıke júıesinde kináraty bar jáne tirek-qımyl apparaty buzylǵan 1,5-18 jas aralyǵyndaǵy múgedek balalar men psıhonevrologıalyq aýrýlary bar 18 jastan asqan adamdarǵa úıinde áleýmettik qyzmetter kórsetedi.
Ortalyqtyń taǵy bir artyqshylyǵy – jartylaı stasıonarlyq úlgide jumys istep, áleýmettik-turmystyq, áleýmettik-medısınalyq, áleýmettik-psıhologıalyq, áleýmettik-pedagogıkalyq, áleýmettik-eńbek, áleýmettik-mádenı, áleýmettik-quqyqtyq, áleýmettik-ekonomıkalyq qyzmetter kórsetiledi. Bul degenińiz jumys isteıtin ata-ana aýrý balasyna alańdamaı, ortalyqqa qaldyryp, kúndiz jumysyna kete beredi.
«Aıala» áleýmettik qyzmetter ortalyǵynyń negizgi maqsaty – árbir qyzmet alýshynyń jeke damýyn eskere otyryp, olardy ońaltý, kúndelikti turmysqa da beıimdelýine kómektesý jáne qoǵamǵa ıntegrasıalaý. Al osynaý jaýapkershiligi joǵary jumystardyń arǵy jaǵynda kemtar adamdardy kútip-qaraýda asqan sabyr men tózimi, meıirimdi de jyly júregi bar áleýmettik qyzmetkerler tur.
Almatynyń Qurmanǵazy atyndaǵy Qazaq ulttyq halyq aspaptar orkestriniń eńseli ǵımaratynda áleýmettik qyzmetkerler tórge otyrǵyzylyp, qurmet kórsetildi. Osy mekemeniń de, syrqat jan baǵyp otyrǵan otbasylardyń da ystyq-sýyǵyna birdeı tózip, olarmen qıyn sátte birge bolyp, adal qyzmet etip júrgenine 15 jyldan asqan ardagerlerdiń keýdesine mereıtoılyq medal taǵyldy. «Alǵys hatpen» marapattaldy. Qushaqtary gúlge toldy. Án-jyrdan shashý shashyldy. Almaty qalasy Jumyspen qamtý jáne áleýmettik baǵdarlamalar basqarmasynyń basshysy Baýyrjan Jaýbasov 35 jyldyq belesten ótken áriptesterin quttyqtap, jyly lebizin bildirdi.
Zýlfat TALIPOVA, «Aıala» áleýmettik qyzmetter ortalyǵynyń bólimshe konsýltanty:
– Bul salada eńbek etip júrgenime jıyrma jyldan asypty. Qazir «Aıala» áleýmetitk qyzmetter ortalyǵynyń 1,5-18 jas aralyǵyndaǵy múgedek balalarǵa úı jaǵdaıynda qyzmet kórsetý bólimshesiniń konsýltantymyn. Múmkindigi shekteýli balalarǵa úıine baryp qyzmet kórsetemiz. Iá, árıne, ońaı emes. Biraq múgedek jan baǵyp otyrǵan ata-analarǵa qoǵamnan, aınalasynan demeý, qoldaý kerek. Biz olarmen qandaı jaǵdaıda da birge ekenimizdi bildiremiz. Men de múmkindigi shekteýli balalardyń ýaqytynyń jaqsy ótýine úlesimdi qosyp júrgenimdi maqtan etemin. Aqyl-esi tómen degen balalardyń ózi úıge kirip kele jatqanymyzdy daýysymyzdan tanyp qýanady, kúlimdep, seni kútkenin bildiredi. Ol da bir ádemi sát qoı. Sondyqtan jylýymyzdy aıamaýǵa tyrysamyz. Bárimiz birdeı bul jumysty qıynsynyp ketip qalsaq, ol jandarǵa kim qamqor bolady?! Memleketimizge rahmet, osyndaı áleýmettik toptaǵy adamdardy óz jaǵdaıymen qaldyryp qoımaı, qoldaý kórsetip otyrǵan. Osyndaı eńbegi baǵalyp, tósbelgi alǵan áriptesterimdi maqtan etemin jáne barlyq jaqsylyǵyna tilekshimin.